陳國邦羅敏莊 公開BB話
無綫笑匠王祖藍日前孖實陳國邦、羅敏莊（Mimi）夫婦傾密偈，雖然平日國邦予人感覺慢條斯理，不過問到祖藍將來會否生小朋友時，竟把祖藍殺個措手不及，還把他嚇窒！不過祖藍也不甘示弱，大爆兩夫妻開着免提跟對方以BB相稱，簡直冤氣到暈！
陳：陳國邦 王：王祖藍 羅：羅敏莊 記：記者
演藝出身
記：不如你哋講吓點in演藝學院？
陳：當年我係第一屆，第三次面試去金鐘兵房度in。搵路期間，我同一個人平排行上去，我問佢：「咦！你又嚟面試？」佢就話：「係呀！」面試時先知佢係in我嘅老師毛俊輝，當時真係呆晒！仲記得面試時有人問我：「點解你咁鍾意做戲？」個答案用到依家，我話：「人生無論係幾咁精彩又或者坎坷都好，都係得一生嘅經歷，但做戲係可以用一生嘅時間去經歷唔同嘅人生。」
羅：有同學幫我寫面試信，我見咁着數就去in！面試時鍾景輝（King Sir）問我：「點解你想嚟演舞台劇？」我話：「因為我唔知舞台劇係乜，我一套都未睇過！」點知就收咗我，後來先知老師想揀一張白紙由零教起！
王：至於我當年因為升唔到原校中六，會考得11分，所以要搵避難所！我記得讀演藝臨畢業時，King Sir話（King Sir上身)：「你知唔知呢行最緊要係啲乜？係人際關係，呢一行十份工有九份都係人哋介紹嘅，淨番嗰份咪就係我囉，因為我係in番嚟！」
柔情一面
記：祖藍，不如爆吓Mimi同國邦點Sweet法？
王：你哋成日都互嗌BB，最慘係有時坐佢哋車，Mimi同國邦傾偈係用speaker phone，搞到全車人都聽到！同埋我平時見做「彭三順」嘅國邦師兄係好cool，佢嗌老婆做BB，真係好唔慣！
羅：你同李亞男都好Sweet！我仲記得你未公開之前，匿埋用國語講電話，本以為對方係台灣人或大陸妹，當揭盅知道係阿男時，啲人就Challenge你哋，當時好嬲，我即刻Send個訊息畀你：「朋友，你嘅內心、愛心同才華已經高過晒所有嘢！」
王：因為我擔心影響到佢（女友）嘅事業，所以冇公開，同埋佢嗰陣喺北京，我哋慣咗用國語溝通！
有囡心足
記：Mimi、國邦，你哋覺得做咗父母對你哋最大嘅改變係乜？
羅：囡囡令到我哋好開心，好多人同我講：「你老公笑多咗好多，講多咗好多嘢！」
陳：做咗父母之後，真係有個心想將自己嘅生命延續落去，而我都好想囡囡同我類近啲！我同太太睇電視節目好南轅北轍，佢覺得睇卡通片好開心，但我就會帶個女睇恐龍、睇霍金宇宙呢類節目。
羅：（扮BB慘樣）個女真係好慘‥‥‥
陳：當然我唔希望佢承襲我嘅缺點，好似太靜唔鍾意講嘢咁，幸好佢性格似阿媽，表情多多。既然佢外在已有媽媽開朗嘅性格，如果加埋爸爸內涵上嘅訓練，咁就好啦！係喎，祖藍你會唔會生BB？
王：（驚愕）嘩！你突然咁問法‥‥‥我諗我會嘅！
陳：點解我會咁問呢？雖然我唔知祖藍追過幾多女仔，不過作為一個藝人，你要咁open面對另一半，已經係好大嘅承諾！
王：我會想有小朋友，不過阿男本身見到我咁忙，會擔心我係一個點嘅爸爸。但自從我細佬個BB出世後，佢見到我點對BB之後，心態上開始有啲改變！
羅：女人係咁o架！雖然有啲人講生BB係好幸福，但我覺得老公抱住個女就真係好幸福，所以我覺得阿男就應該係咁！
後記：
熱愛演戲的三人均出身於演藝學院，故是次訪問十足像校友座談會一樣，講起校園趣事時，非常雀躍，令訪問火花四濺！雖然他們分別畢業於不同年份，不過仍恍如置身於讀書的平行時空。驀然發現，他們除同樣擁有熱愛演藝的心外，更重要是有一份永不磨滅的校園情。