仙樂都面腫腳傷呻受虐
模特兒「仙樂都」吳堯堯（YoYo）、王璐瑤（LuLu）及多名o靚模最近忙於拍攝有線節目《7條事業線：食腦任務》，因節目安排她們履行高難度及勞動性工作，一眾o靚模叫苦連天，YoYo早前拍攝學功夫一集時更受傷，她直言有線沒有憐香惜玉，有虐待一班o靚模之嫌。
損失五位數
當日YoYo等o靚模拍攝學功夫做保鏢的單元，師傅對她們十分苛刻，無論拉筋及對打均毫不留情，當中o靚模Kiko（柯嘉琪）及Daisy（洪詠詩）已辛苦得喊晒，而YoYo與師傅過招時因抵受不住重拳而失足撻落地，左膝當堂瘀青及腫了一大片，她按着傷口落淚呼痛，最後更要停機，由工作人員帶她睇跌打。
YoYo表示受傷後有多日行走不便，要無奈推Job，損失近五位數，她說：「受傷嗰陣痛到腦袋空白一片，可能師傅留咗力都仲咁大力，我塊面都畀佢打腫咗，都驚整傷筋骨！（向有線投訴？）我都反映咗問點解咁辛苦，但會繼續應付挑戰嘅！」據知，其他o靚模均有怨言及離隊打算，但礙於已簽約，故只好頂硬上錄影餘下集數。
頂硬上歸隊
對此，節目監製曾小姐表示拍攝前眾o靚模已答應可進行厭惡性工作，問到是否覺得她們不專業？曾小姐說：「唔好咁講，仙樂都之後都有歸隊，我哋安排嘅工作又係辛苦。（之後節目改簡單啲？）咁又唔會，我哋繼續原定方向，不過會做好啲安全措施及事前訓練。」據知，節目已安排她們扮洗車妹及農夫，其後則要做裝修工人等，相信眾o靚模仍有排辛苦。
文：影視組