杜汶澤行俠仗義活剝周秀娜

阿澤一連三場的《咔啦騷》前晚於會展揭開序幕，吸引汪明荃、陳志雲、蔡卓妍、泳兒、鍾舒漫、湯怡、衛詩雅等前來捧場，過氣情侶吳浩康及莊思敏更大方合照，全場座無虛席。神秘嘉賓周秀娜以太空人裝亮相，被吊高出場，阿澤緊隨其後現身謂：「大家畀480蚊，估唔到有得『吊』周秀娜，仲要『吊』兩次喎。」又伸手幫對方脫掉太空衣，全場起哄後他續謂：「你前男友趁你唔知，帶咗其他女仔『上太空』，我依家就眾目睽睽帶你上太空，我好有義氣嘅。」娜姐回道：「我做人好腳踏實地嘅。」

寸爆亞視冇人識

談到自己以往欠貴利，返港當藝員擔心再遭追債，阿澤笑說：「當時蕭鍵鏗（前亞視監製）同我講唔使驚，因為喺亞洲電視本港台當藝員，做明星做一世都冇人知o架。」擺明寸爆亞視。當提到與第一任妻子離婚，歸根究底都錯在自己年少輕狂，阿澤幽默說：「溝無綫嘅女全世界都知，但喺亞視溝女溝咗連佢自己都唔知。」阿澤又不諱言與田蕊妮（阿田）結婚後，蒲夜場時即使老婆坐在身旁，都試過與異性激吻，又被阿田發現自己的情慾短訊：「到我得罪人冇戲拍嘞，阿田話我仲有佢喺身邊。如果人生有四季嘅話，40歲開始就係我嘅春天……我祝台下每位男士都搵到你哋心目中嘅田蕊妮，但女士就千祈唔好遇到杜汶澤。」

放大圖片	阿澤表示要為剛甩拖的周秀娜出番口氣。	（左起）鍾舒漫、蔡卓妍、泳兒、湯怡與衛詩雅齊捧杜汶澤場。

完騷搵老友解釋

感懷自己身世外，阿澤當然少不了「提」到身邊好友，吳君如、杜德偉、林峯無一幸免，談到余文樂，阿澤更表示：「當年我結婚，吳雨霏（Kary）有份做姐妹，余文樂同我講覺得佢好靚女，我就話叫佢努力搵錢先好去追人。」事後阿澤接受訪問，直認事先沒有向一眾友好「單聲」：「等我24日完騷，休息番一日，26日咪打去同佢哋講囉。（當年睇得出阿樂鍾意Kary？）邊feel到吖，不過talk show內容有九成真。（老婆知你講佢啲嘢？）佢都唔知o架，今日仲要去咗澳門做嘢。（老婆外家知你咁對佢哋個女，使唔使解畫？）唔使啦，都浪子回頭嘞。」

文：影視組