梁烈唯省靚招牌捱出頭
出爐「飛躍進步男藝員」梁烈唯雖然名成利就，回想未紅時，唯唯試過「我不知他是誰」而被人看輕的滋味，不過今非昔比，唯唯除了被觀眾認同外，現時出街不時被途人喚出名字、邀請合照，認真威水！
梁烈唯（唯唯）入行超過十年，終於捱出頭，在台慶頒獎禮中以大熱姿態勇奪「飛躍進步男藝員」，事業穩步上揚的同時，他不忘曾被人看輕的經歷：「有一次同張智霖食飯，點知畀人影咗，跟住篇報道以張智霖友人嚟形容我，其實我都拍咗戲一段時間，係圈中一分子，但原來係冇人識！」
遭保安攔截
又有一次，唯唯參與劇集宣傳活動，當他進場時竟被保安攔截，他說：「我想行入去嘅時候，個保安截住我，我同佢講去做宣傳，佢反問我做乜嘢宣傳，當時我好嬲，不過佢係唔認得我都冇辦法！後來我明白到原來人哋唔識我都係一種動力，咁我就努力啲，只要唔放棄，就會有成功嘅一日。」
現成街粉絲
默默耕耘唯唯終於有美滿的收成，實在可喜可賀！現在唯唯出街即時被市民認出，有時更會邀請他合照：「自從《缺宅男女》播出之後，真係多咗好多人認得，到今時今日仲有人嗌我『關二哥』。後來播出《飛虎》之後，發覺自己其實都型得起，除咗叫我『阿源』之外，啲人仲會主動搵我影相！不過依家我去旺角，有啲青少年就會叫我『山雞』，你話一個角色對一個演員嘅影響幾大！所以令我更加覺得，如果自己喺條街度，都會好behave，希望可以對喜歡我嘅人做個好榜樣！」
文：專案組
攝影：司徒國榮
服裝、場地：Chocoolate＠銅鑼灣