朱咪咪送叉燒搶客

朱咪咪將於下月23、24日假紅館舉行《朱咪咪大吉利是演唱會2013》，正值新年期間，個唱上除有舞獅搞熱氣氛還會派錢，咪咪笑說：「我傾到贊助商送燒味現金券，成50蚊一封o架，睇我騷有叉燒、燒肉食，依家啲食材咁貴，睇我騷有免費餐食，係咪好正呢。」至於甄妮比她早3日開演唱會，可擔心捧場客被分薄？咪咪信心爆棚謂：「梗係唔會啦，我唔怕佢，我同甄妮客路都唔同，佢係唱國語歌為主，我就係唱通俗歌，雖然我唔係偶像派歌手，但我都好多唔同年紀嘅fanso架，除咗有班固定嘅成熟fans支持我，仲有細路仔同後生仔女鍾意我，因為我拍好多廣告，又拍電視劇，我健康形象入晒屋。」

返星洲為母賀壽

咪咪最近除積極籌備演唱會，早前不惜推了大量商演騷，趕返新加坡為90歲的母親做大壽，和母親開枱打麻雀耍樂，問她可有鬆章給壽星婆？咪咪笑謂：「咁又唔會喎，我哋好均真，最多贏咗錢都唔收。」不過因咪咪媽已屬高齡，加上年老肺部較弱，故只可以打「一個東」（即四圈）。咪咪透露媽咪要用氧氣機幫助呼吸，現先要解決氧氣機的叉電問題，才考慮是否安排媽咪來港看騷，但若媽咪因身體問題未能捧場，她也不會特別失望：「因為主辦單位會幫我拍片，我再寄畀媽咪睇，其實我都唔想媽咪咁操勞。」

朱咪咪獲歌迷支持信心十足，無懼甄妮比她早開騷。

甄妮

文：音樂組