梁漢文多sing道笑爆肚
離巢在即的梁漢文（Edmond），認為人生有好多不同階段，跳槽實屬平常事，新歌無聊中帶出意思，他更大晒其語言天分，唱泰文、冰島話，連西班牙文都噏到兩句，又勉勵大家做人要有正氣。
即將約滿金牌大風的梁漢文（Edmond）離巢大局已定，他透露很快揭盅，入行20年先後轉換過三間唱片公司的Edmond說：「我喺金牌眨吓眼都十年，每個人都有唔同階段，轉公司或者離開都係好自然嘅事，大家唔使諗多咗，係正常嘅。」Edmond重申跟金牌合作多年，大家非常愉快，雖則近年公司人事變動較多，但跟同事們相處很和諧，他說：「真係冇任何唔開心！」
感染歡樂
約滿前Edmond推出最後一張以其英文名《E.d.M.O.N.D》作新碟，因為每個字母代表一首歌，好似新歌《MMM》題材來自他們90年歌手上電視「夾口形」唱歌，當時無人會鬧，但現今歌手被揭是夾口形就畀人鬧到飛起，他說：「原因好簡單，因為以前大家唔知，首歌係想講呢個世界好得意，好多事唔知好過知。」他笑言歌曲內容好無聊，「你唔知好過知」這句歌更唱了五種不同語言演繹，包括廣東話、泰文、西班牙話、韓文及冰島話，他笑說：「泰文最難學，我又唱得乞人憎，錄嘅時候笑到肚痛，流晒眼水好辛苦，但好過癮。」他希望一首好笑好玩的歌能感染大家都有歡樂。
保留正氣
Edmond有感近年少唱勵志歌，找來老友Eric Kwok、黃偉文炮製了一首《正氣歌》，但就否認是為最近是非新聞而製作，他說：「愈來愈發覺人大咗，或者喺社會做事做得耐，人嘅身體本身流住一啲正氣，但慢慢就會流走啲，做人做事應該要保持住呢股正氣。」而老友吳國敬也為Edmond作了首有關友情的新歌：「身邊朋友都會有啲改唔到嘅習慣，但朋友就要互相寬恕體諒。」
文：音樂組