郭晉安嘲萬綺雯烏龍王
「亞視一姐」萬綺雯首次為無綫拍劇，先遇到郭晉安再遇苗僑偉，能與這些好好先生合作笑言好彩，安仔指合作時感覺到萬綺雯緊張，更指她是少見的烏龍王。而萬綺雯為免「難為觀眾雙眼」，不會像陳煒般以泳裝性感演出。
萬綺雯過檔無綫的第一部劇集《老表，你好嘢！》，與郭晉安飾演一對，「初到貴境」即遇到人品好、性格佳的安仔，安仔演帶內地團的導遊，萬綺雯則是為新移民出頭的社工，是對鬥氣冤家！
勸早生BB
首次合作，安仔笑言萬綺雯是他近年少見的烏龍王：「有一次佢揸咗車出外景，返到公司就唔記得咗，仲跟大隊上公司車，睇得出佢第一次有啲緊張，好多嘢好陌生、唔會夠膽提出，不過我同佢話，你有乜嘢都可以同我講，但公司有公司制度，好多嘢都要妥協。」二人同屬天秤座，有甚麼事都會開聲互相提點，所以傾得埋，已為人父的安仔更勸她快點生小朋友！
此劇曾被指醜化內地人，安仔指其實是想帶出和諧共處的訊息，他可有受過大陸人氣？安仔說：「佢哋同你影相唔會先問你，個頭黐埋嚟係咁拉你手影相，通常我都要求影過張好啲嘅。我身為人父有責任去教育下一代，好似去迪士尼有啲內地人唔排隊，我都會出聲，即使佢哋唔理，身為父母都要做個好榜樣。」
無謂晒水着
萬綺雯跟無綫簽部頭約，計劃逐部傾：「連續拍咗半年，都要重新叉電，不過拍呢套劇都好開心。」陳煒到無綫拍劇，晒胸又泳衣上陣，萬綺雯笑言要睇劇情而定：「不過泳衣唔好嘞，無謂難為大家雙眼啦！我喺《好心作怪》嗰度都有同三哥（苗僑偉）攬攬錫錫，不過我都好彩，遇到嘅都係錫老婆、仔女嘅好男人。」
文：影視組
攝影：劉智源