薛家燕奉旨培訓亞視兵
免費電視牌照愈爭愈烈，繼無綫最近入稟高院申請司法覆核，無綫亦與多年「死敵」亞視化敵為友，繼出席慈善步行兩台高層、藝員齊晒冷後，據知，無綫應亞視邀請派出薛家燕為亞視「訓練班」擔任導師，擺明聯合亞視同仇敵愾對抗王維基的香港電視。李寶安受訪時也坦言說：「王維基攻擊無綫，好難做朋友。」
無綫、亞視近期突然化敵為友，緣於同仇敵愾反對發放免費電視牌照，兩台繼慈善步行「聯盟」晒冷後，無綫將應亞視邀請，破天荒將於下星期一派出薛家燕擔任亞視「訓練班」講師。
據知促成今次交流，緣於兩台高層日前出席慈善步行時談到合作可能。由於無綫高層李寶安、區偉林曾在亞視工作，與亞視高層鄺凱迎和葉家寶分屬好友，當日眾人便談及兩台可否合作，期間鄺凱迎講到汪明荃是麗的第一期訓練班學員，隨即靈機一觸邀請阿姐擔任講師。李寶安亦覺得大家是朋友，同意交流，但因阿姐未能度期，改由薛家燕頂替。家燕姐曾先後在麗的、亞視、無綫及電台工作，經驗豐富。
王維基難做朋友
無綫集團總經理李寶安接受電話訪問表示：「大家係好朋友，我哋唔排除呢啲學術性交流，佢哋搵啲藝員嚟無綫教都可以，大家係好朋友，呢啲合作亦顯示團結。」問李寶安是否要顯示團結力量給王維基看？他說：「唔止要畀王維基知道，係要畀所有人知，所有人都可以做朋友，只要對方態度友善，王維基攻擊無綫，就好難做朋友。」
家燕姐受訪時講到為亞視任導師，她說：「唔好講話教，自己都樂於分享唔同地方嘅工作經驗。」亞視高層葉家寶則說：「家燕姐做過幾個媒體都好成功，同埋經歷過人生低潮，可以幫同學增值，我哋會送番紀念品畀家燕姐。」
文：影視組