嘉玲：除非意外天賜

近期偉仔忙於宣傳《一代宗師》，昨日兩人分道揚鑣，偉仔及王家衛夫婦前日抵台宣傳此片，嘉玲則留港出席Chaumet店舖重新開幕擔任揭幕嘉賓。情人節將至會送甚麼給偉仔？嘉玲說：「佢乜都有，有我最寶貴。」偉仔昨日在台受訪時透露沒有生育計劃，夫婦已有共識。對此嘉玲說：「我哋有詳細溝通過，依家係科技嘅時代，刻意製造係可以，但我哋暫時覺得依家好舒服。（如果有意外呢？）有意外會要，因為係天意。」

演藝生涯大突破

偉仔忙於四出宣傳新片，嘉玲亦不忘為老公造勢，大讚片中每位演員都出色，偉仔更達另一境界：「呢套戲睇到唔同嘅梁朝偉，係佢演藝生涯好大突破，同以前好唔同，好穩定、好沉着，唔需要講嘢，有佢喺度就有一股力量！」

有指章子怡搶了偉仔戲份，嘉玲說：「我唔覺得，可能佢做得太好，啲人嫌唔夠喉。」又大讚盧海鵬、張震搶鏡，而最令她驚訝是張晉：「佢演出令我好意外，冇諗過佢咁識做戲，章子怡亦好好，佢真係演到宮二，不計後果去追求自己嘅嘢，我都好希望有份做，可惜冇。（宋慧喬嘅戲被刪剩六分鐘？）唔應該講戲份多與少，大家應該睇下視覺上嘅享受，王家衛心目中嘅武林世界係點，佢個個都拍得好靚。」至於日後偉仔會否憑此片再奪影帝，嘉玲認為已不重要：「因為佢享受咗拍戲過程，仲有受傷。」

否認菲女吵大鑊

有指王菲與女兒竇靖童（童童）嗌交她做和事老，嘉玲否認此事，指兩母女感情要好，童童是否拍拖？嘉玲說：「就算拍拖都好正常，不過童童變咗好嫵媚嘅女仔，我都好唔慣。」另外，《一》片大前日在內地全國公映，目前票房已達5,300萬人民幣，破了王家衛在內地的票房紀錄。

文：名人組