栢芝遭狂迷突襲防暴警救駕

在內地人氣高企的張栢芝，近年經常到內地出騷搵真銀，所到之處，都獲大班「芝迷」簇擁，大前晚，張栢芝便到湖南省婁底市為「幸福婁底．美麗家園」2013跨年巨星演唱會任嘉賓，當栢芝腳踏五吋高跟鞋在台上獻唱期間，有一名男狂迷表現十分激動，還衝上台欲擁抱偶像，結果引起了一場騷亂！當該男歌迷突破重重保安圍陣走上台時，在場工作人員極之緊張，擔心多年前栢芝被狂迷走上台從後擁抱的事件重演，而一班穿了整套防暴武裝的公安見狀亦反應迅速，立即跑上台並用猛力拉扯該男歌迷，結果成功阻止該男歌迷撲向栢芝！由於衝力、拉扯力度甚猛烈，在台邊的觀眾都嚇了一跳，而正於台上唱歌的栢芝，目睹事件經過，亦十分吃驚！但為了不影響在場其他觀眾欣賞演唱，只好故作鎮定，笑着把歌曲唱完。

腦中一片空白

事後栢芝接受訪問仍心有餘悸，因當時情況實在太混亂，她表示：「當時好凍落緊雪，地下都結冰，未發生事之前有啲公安都跣親，而當男粉絲衝上台嘅時候，我都無時間去驚，個腦一片空白，到之後返到酒店先開始識驚，又擔心粉絲會受傷，因為當時個男粉絲衝上嚟嘅力度都好大，而公安亦好專業咁拉番佢落去，其實粉絲支持我當然好開心，但都希望佢哋小心注意自己的嘅安全。」

除夕湊仔開Ｐ

2013年正式到來，前日已從婁底回港的栢芝，趁昨晚除夕夜，特別搞了一個小派對，與Lucas、Quintus以及家人親戚共度一個溫馨晚上，共度佳節。

文：影視組