周柏豪自認牛郎冇時停
周柏豪不單集型英帥於一身，更有一排煞食的「朱古力」身形，迷倒萬千少女的他竟然高呼恨拍拖！不過他自言似隻牛，橫衝直撞冇時停，因此女友最好都是勤勤力力，快快手手，唔係遇着懶人會很易吵架！
型男周柏豪為了演唱會，苦練「朱古力」身形，外形Man爆的他大談理想女友的條件：「今年我有一首歌叫《拿愛情給我》，其實就係表達我喺現實生活中渴望愛情，希望有人錫、有人愛。（理想女友的條件？）一定要有愛心、修養、仲要錫屋企人！」他更笑言自己是一頭牛，故對方不能是懶人：「我為咗做嘢可以連覺都唔瞓，我係一隻牛，橫衝直撞永遠都唔會停，所以對方唔可以係懶人，如果唔係一家火星撞地球，好易吵架﹗」
盼新年健康啲
一向以孝順見稱的周柏豪，早前為免婆婆離世前會有所牽掛，故刻意向婆婆隱瞞將舉行演唱會，以免她想欣賞又不能欣賞而不開心，他說：「今年初佢都有嚟睇我第一次舉行嘅音樂會，咁佢嗰時睇咗就已經無遺憾！」雖然婆婆離世已幾個月，但他坦言仍未釋懷：「《無力挽回》呢首歌我係為婆婆而作嘅，其實每次聽嘅時候我都會喊，因為其實我對婆婆嘅離世仲未釋懷，始終我同佢相處咗差不多廿八年。」
此外，周柏豪指自己在2012年體弱多病，所以即席揮筆繪畫一個大隻仔，希望自己在新一年能健健康康，像畫中人般強壯。
文：李佩珊
攝：劉智源
髮型：Cliff Chan @ Hair Lorner
化妝：Kris Wong