文恩澄微電影教TB追女

創作歌手文恩澄（Rannes）除了對音樂情有獨鍾外，最近「踩過界」執導兩套微電影《不日上釣》及《預見》，請得模特兒楊汀叮及澳門女歌手小瑜擔任主角。

兩片在短片比賽中得到優異獎，為初次任導演的Rannes打下強心針！《不》片網上版名為《溝女！唔使用劍嘅》，講述飾演TB的小瑜以不同招數追求汀叮，題材創新。

文恩澄（中）執導的微電影獲獎，與主角汀叮（右）及小瑜分享喜悅。

小瑜（左）大讚汀叮吸引，表示會展開攻勢。

Rannes認為TB更了解女性心態，藉短片「教精」男士：「呢個構思可以話係為小瑜度身訂造，我哋一齊傾，得出好多追女仔嘅招式，都worko架！」小瑜笑言現實中的她比較怕醜：「我可能都會諗定幾招，但唔會咁明顯，唔會一晚之內使晒出嚟。」

吊住女仔癮

個性被動的汀叮笑言起初不明白「招式」是何解，但其後也甚為贊同：「好似話要吊住個女仔癮，都準，可以吸引對方繼續傾偈。（畀TB追求過？）未呀！我都想試吓，因為啲TB朋友真係好細心同啱傾啲，都幾吸引。」身旁的小瑜即表示會展開「攻勢」，汀叮亦笑言「奉陪」。

對於近年女同性戀開始獲社會廣泛接受，三人均認為真愛不應以性別區分，Rannes說：「選擇咩方式去愛人係個人選擇，最緊要真心，都開心見到愈來愈多名人願意出櫃！」

文：立影　

攝影：司徒國榮

場地：Red Thai＠Mikiki

服裝：1950 by doublestep（Rannes＆汀叮）