黃德斌年少無錢 喪失7成聽力

擁有42吋巨胸的型男黃德斌外表剛陽，但原來右耳只有3成聽力，他坦言全因家貧所致：「我讀完書就去做跟車工人，朝朝7、8點就同同事游完水先返工，啲水入咗耳仔我又冇理，到發炎、流膿先去睇政府醫生，嗰時因為屋企環境唔好冇錢睇私家，點知政府就要排期成年半先有得睇！由最初只係普通發炎，去到日日瞓醒就發現枕頭有血，最後阿媽捉我去睇急症，醫生一睇就話我情況嚴重，幫我全身麻醉做手術，切除耳仔入面增生嘅肉，但可惜最後右耳得番3成聽力。（因為冇錢睇私家先搞成咁？）絕對係！」

家教嚴 冇入黑社會

不過德斌從無埋怨家庭環境欠佳，更笑言靠自己雙手變Blueblood：「好多嘢我都覺得係整定，我又唔係Blueblood，我唔會怨，惟有做嘢賺錢變Blueblood啦！哈哈！」他更感謝已過身的嚴母：「細個媽咪對我家教好嚴，連學校旅行都唔畀我去，但如果唔係咁，我可能已經畀人斬死咗！因為以前屋企對面係公屋，有好多黑社會，如果唔係家教嚴，我可能已經跟咗大佬！」

黃德斌與佘詩曼合作的《天與地》備受好評。

黃德斌自幼經歷令他演苦情戲手到拿來。

對於亡母未能見證現時的演藝事業，德斌坦言有遺憾：「媽咪睇唔到我做戲都係一個遺憾，我好想佢睇到我喺《天與地》嘅演出。因為佢本身係歌迷又係戲迷，以前成日喺屋企唱歌，佢好鍾意睇粵語殘片，但屋企因為冇電視，佢就成日唱歌。她臨走前幾年成日叫我去唱歌，叫我做歌手，但係我唔聽。之後我入咗藝訓班，成日做路人甲乙丙，佢冇點睇我做戲就過咗身。」

文：李佩珊

攝：劉智源

場地：MM/H生活築閣

化妝：Jan @ Annie G Chan