湯寶如倒V露閃爆三角
湯寶如紅館處女騷認真「膊」到盡，罕有穿上露膊谷胸婚紗，與猛男大跳辣身舞，又「腿張開」擺出誘人甫士。跳到興起時，更使出「倒掛金鈎」露出神秘閃爆三角褲，燦眼又吸睛！
湯寶如（湯記）前晚終於初嘗踏紅館的滋味，舉行「湯寶如20年零一夜狂歡演唱會2012」，另一半陳德民及囝囝則秘密入場支持。湯記是「末日」後首個在紅館開騷的歌手，她甫出場即說：「終於過咗世界末日嘅詛咒！」
苦等20年的處女騷，湯記當然瞓身演出，換了一襲銀白色的谷胸露膊婚紗，風騷地坐在櫈上擘髀，又與8位男舞蹈員大跳貼身辣舞。被猛男狂掃玉背及腰後，她亦唔執輸向猛男「施襲」，大摸對方的大腿內側，意識大膽！當跳到興起時，由幾位「裙下之臣」抱着，湯記「倒掛金鈎」高舉V字腿，倒奶之餘，更露神秘閃爆三角褲，全場睇得慶合合！
下年回歸樂壇
寶麗金小花黎瑞恩、劉小慧亦「胸」降做嘉賓，而阮兆祥、草蜢則向全場放笑彈，大話當年情。由於黎瑞恩在台上落樓梯時，不慎連跣幾級仆倒，嚇到湯記之後亦要請工作人員攙扶下樓梯。湯記在Encore環節，一度淚灑舞台，預告明年重返樂壇：「我唔知幾時會再消失，但2013年我希望出嚟同人『撼』過！」
騷後，湯記表示十分擔心發生意外的黎瑞恩：「我個心好唔舒服，呢個人情唔知點還，總知醫療費用我畀晒。」由於在台上尺度大膽，囝囝可要「家長指引」？她謂：「佢睇完綵排都話想繼續睇，仲畀咗支玩具咪我唱歌，總算畀佢見識到我工作係點運作。」
文：音樂組