寄婆孫情周柏豪振作寫歌

周柏豪經常在微博發表感性文章，因而被網友戲稱「大文豪」，指他「男人老狗」過分感性，然而他對此稱呼只一笑置之，他只知道透過文字和照片來表達心情，未嘗不是減壓的方法，早前他至愛的外婆離世，同樣透過寫歌來紀念外婆，新歌《無力挽回》中的一句「念在愛你的，別叫她難受」，完全表達了他此刻心情。

思念藏心中

柏豪直言外婆離開確是一個很大打擊，他曾一度躲在家中痛哭，不想見人，然而他亦不想自暴自棄，令家人擔心，他說：「當然仲好掛住婆婆，但依家諗開咗好多，因為我唔想屋企人難受，依家屋企嘅氣氛無之前咁沉重，我哋都想將呢份思念放喺心入面，凡事想正面啲去諗。」

周柏豪透露外婆曾希望他早日成家立室。

即將開騷的周柏豪會以打籃球練氣。

當他憶起與外婆的往事時，亦自豪地表示有做好孫兒本分，他說：「其實外婆走得無遺憾，至少我係咁覺得，我好錫佢，以前一有時間就去見佢，呢份愛相信佢係感受到。」

做運動練氣

問到柏豪以前外婆有否催他早日結婚，他說：「老人家成日都講，仲話畀埋錢我娶老婆，但我解釋佢知我係想做好啲事業，要有一定成就先諗成家立室，唔係會累咗人哋。」而即將舉行演唱會的他，表示一向有跑步和打籃球練氣，還賣口乖經常有運動品牌贊助，做運動時一定事半功倍。

文：專案組

攝：鄭家俊

服裝：adidas