林欣彤報平安：我冇事
英皇歌手林欣彤（Mag）出道時氣勢如虹，今年中突然喉嚨生繭兼失聲，有指休養期間她患上抑鬱及厭食症，Mag昨日透過電話報平安，她笑說：「我冇事，唔使擔心。」而無綫會視乎Mag的康復進度，月底為她安排工作。
憑無綫《超級巨聲2》勇闖樂壇的Mag去年成功簽約英皇，並推出處女專輯，獲公司力捧的Mag即人氣急升，正當上位之際，今年中宣布因喉嚨生繭兼失聲要停工休養，近日有指她患上厭食症搞到激瘦兼抑鬱，令一眾愛錫她的歌迷極度心痛。
復出視乎康復進度
記者致電Mag求證，問到是否患厭食症？她先哈哈大笑，隨即報平安說：「我冇事，唔使擔心。」Mag坦言正處於休息狀態，要視乎身體狀況才接工作，問到病情進展？Mag說：「仲未完全康復，等公司安排工作。」其所屬的無綫經理人否認有關報道，他說：「如Mag情況許可月底會安排工作畀佢。」而Music Plus市場經理Kelvin透露昨日也有與Mag聯絡，指她聲線已有改善，否認她有抑鬱或厭食症，又澄清她沒有跟容祖兒不和：「祖兒仲介紹中醫畀阿Mag。」至於阿Mag的工作安排，英皇也待無綫回覆。
胡鴻鈞：佢冇哭訴
與Mag同期出道的胡鴻鈞昨日出席活動，對於Mag被指患抑鬱，胡鴻鈞說：「唔知，不過早前佢心情唔好，因為把聲問題。（同你哭訴？）冇，佢都要休息幾個月。」胡鴻鈞透露早前亦有與對方傾電話，他說：「我哋久唔久都會傾電話，聽佢把聲好番好多。（佢停晒所有工作？）好吖，可以靜心休養。」
文：音樂組