婷婷有嫁期獨欠浪漫求婚

謝婷婷與安志杰(Andy)昨日在活動上公然大晒恩愛,而婷婷更開到聲想要一個浪漫的求婚過程,獲Andy飯應,二人又坦言不會閃電結婚,因一生人一次,婷婷更表明屆時會搵媽咪狄波拉擇吉日!

昨日婷婷與Andy以情侶檔在快餐連鎖店活動上為兩對準新人甜蜜證婚,齊齊搵真銀,二人全程糖黐豆攬到實,而婷婷更像小鳥依人般依偎着男友,當大會司儀問二人會否在2013年1月4日取其「一生一世」之意而結婚?婷婷笑而不答,及後接受訪問時坦言進場時有預演婚禮的感覺,更笑稱司儀也透露了二人的婚期:「佢都講咗少少!(咁擇日未?)未,如果係會搵媽咪!」問Andy求婚未?他直言還未,也不知道何時求婚,在旁的婷婷即說:「佢日日都有求婚!」男方隨即補鑊,表示拍完戲便會求婚,而婷婷則撒嬌說:「佢仲有好多戲拍,應該唔會咁快。」

繁文縟節覺得悶

隨後婷婷表明想要個浪漫的求婚過程:「唔好講隆重同錢問題,最重要係心思。」Andy也大冧女友說:「我唔會畀佢失望!」至於會否就快成事?二人坦言不知道,也不會即興結婚:「始終一生人一次,要做準備。但應該唔會跟中國繁文縟節,因感覺頗悶,(唔想男友畀姊妹團玩?)佢鍾意被玩,佢咁多兄弟,可以搵埋霆鋒。」此時,安志杰像大男人上身,搞笑地說:「我玩兄弟就得,佢哋唔玩得我!」

馬國明1212結婚

另外,無綫小生馬國明昨日在山頂出席活動,見證十二對新人行禮。他自爆昨日是其父母、家姐及姐夫的結婚紀念日,更不排除自己將來選擇同一日結婚,但奈何未有對象,故以工作為先。無綫頒獎禮逼近,問到是否有信心爭視帝?他坦言:「平常心啦!(林峯多fans?)佢係多啲舉牌嘅fans。」對於早前黎耀祥及徐子珊表示以派禮券拉票,他笑言:「未諗到派咩,不過都希望多啲人投票。」

文:名人組