新一代型男周柏豪為演唱會操到一排「朱古力」腹肌，自戀的他自拍放上網大晒性感肉照，做gym做到上癮的他自嘲似有病態，他又為自己訂下兩個目標，希望在三十歲前能夠達標完成。
忙於為月底演唱會排練的周柏豪，在圖片分享網上載一張「露肉」的性感照，自戀地大晒他的六舊腹肌，過萬粉絲激讚他，平日有做運動的柏豪坦言為了個唱刻意狂操，他笑說：「操咗個幾月，又要戒口，仲要日日操，你要愛上做gym先得，因為真係好攰好痛。」他亦預告演唱會上會露肉，他笑說：「到時大家嚟睇就知道，嗰part個畫面好有力量。」
做gym做上癮的柏豪形容自己似有病態，他笑說：「如果嗰日冇操，我就覺得周身唔舒服，就算半夜十二點幾都會即刻操，（出台前使唔使做幾吓掌上壓？）梗係要。」演唱會日漸逼近，柏豪承認愈來愈緊張，尤其是怕記歌詞，自嘲沒有記性的他又要練琴同結他，因此希望一切順利。
今年廿八歲的他，希望三十歲前完成兩個夢想，第一個就是操到六舊腹肌，他笑說：「覺得仲欠少少，個body可以再好啲。」第二個夢想是玩降落傘，他說：「我本身有畏高，希望明年暑假達成心願，喺三十歲完成晒兩個夢想同目標。」
柏豪對今年成績也感滿意，更成功打入「叱咤樂壇我最喜愛的男歌手」最後五強，但有古巨基粉絲卻狂插電台黑箱作業，又遷怒柏豪及羅力威，柏豪說：「冇乜所謂，實有人鍾意有人唔鍾意，惟有做好自己。」
文：音樂組