千嬅拖老公開餐晒殘樣
近期情緒波動變「喊包」的楊千嬅，前晚撇下寶貝仔Torres，與老公丁子高拍拖到銅鑼灣出席友人飯局，素顏上陣的千嬅，露出一雙「熊貓眼」拖實老公步出，甫見記者感到一臉愕然，其後又變回開心果與老公十指緊扣往取車返歸。
有大笑姑婆之稱的楊千嬅，自今年6月為老公丁子高誕下囝囝丁進諾（Torres）後，一直湊仔為樂。不過，早前有指千嬅經常在家跟老公吵罵，加上產後情緒波動，忽然變了大喊十，難怪她自嘲賀爾蒙未調整好，睇電視都睇到喊，連老公都鬧黐線。
見記者愕然
前晚兩公婆撇甩囝囝拍拖到銅鑼灣開平道一間餐廳食飯，至晚上10時許，身穿灰色衞衣、黑色leggings配短裙的千嬅，與老公十指緊扣步出，素顏上陣的她，露出一雙「熊貓眼」，甫見現場記者即感愕然，然後又笑笑口說：「嘩！咩事呀今日？」由於現場停泊了千嬅的七人車，又見丁生的平治跑車，問她是否同屋企人食飯，點解咁多架車？她表示：「我哋同朋友食飯，我兩個後生揸車走，架七人車要車啲Auntie。」說畢，千嬅登上老公的平治跑車，丁子高給小費代客泊車員後，便登上司機位驅車載老婆離開。
為無綫頒獎
此外，「萬千星輝頒獎禮2012」將於下周一舉行，千嬅獲邀擔任「最佳男主角」的頒獎嘉賓，而「最佳女主角」則由葉德嫻頒授，至於近期新聞人物曾志偉亦是當晚的頒獎嘉賓，無綫現時亦正邀請吳君如、吳孟達及張達明等擔任頒獎嘉賓，但他們仍在度期中。對於被指是豬肉獎的「傑出演員獎」，無綫製作部總監（非戲劇製作）余詠珊表示，得獎人有五個，賽果是經過嚴格審核及高層投票所得。
文、攝：追蹤組