吳彥祖寧生醜B 拒做星爸
吳彥祖（Daniel）攜太太Lisa S.及腹中Ｂ女看拳賽，Daniel直言怕囡囡將來入行，無懼B女男仔頭生得醜，他又笑指年輕時曾呃女仔，如今生女便是一個報應。
型男吳彥祖（Daniel）與太太Lisa S.上星期在微博高調宣布懷孕喜訊，前晚兩公婆自喜訊後首次同場出席公開場合，Lisa雖粗身大細，但仍前來欣賞國際職業拳賽。Daniel坦言唔怕Ｂ女睇拳賽，更指囡囡可以學定防狼術，「依家啲男仔好早就追女仔，個女可以學定將來防狼。（唔怕變得粗魯？）保護自己啫，男仔頭都唔緊要，最好無仔埋身，怕畀人呃。（因為你以前呃女仔？）細個唔多唔少有啲。」Daniel笑言當他得知是BB女時，便知道這是上天給他的報應。
留港分娩
Daniel向來以靚仔見稱，但卻表示寧願囡囡生得醜，杜絕Ｂ女將來入娛樂圈，老婆Lisa聞言後亦大表認同。問到可有為BB改名時，Daniel表示中文名會交由爺爺幫孫女改，而英文名要看BB出世後給他的靈感，他又指香港的婦產技術比美國好，已在港預留床位生Ｂ。問到兩人可有意思「乘勝追擊」，Lisa即表示未有打算，又指老公現時已很憂心，笑言要看老公因擔心過度而滿頭白髮甚至脫髮。
文：影視組