葉玉卿訴諸法律六點大反擊
近日回港拍戲的葉玉卿，其母親因肺癌於周日去世。昨日竟有周刊指她復出主因原是撲水救老公！對於種種指控，她昨傍晚強忍喪母傷痛開記者會作出六點反擊，並表示已聯絡香港及美國律師，以個人及銀行名義採取法律行動，以還清白。
葉玉卿日前返港拍戲，順道與母親團聚，但其母原來因肺癌於周日去世，她陪伴母親走過最後一段路。早已講明今次返港只為過戲癮的卿卿，昨日竟被某周刊指她是為了賺錢救老公胡兆明的生意！她與老公商量後，昨傍晚六時半與女兒胡芷欣（Victoria）於酒店舉行記招，對於周刊內的指控逐一作出澄清。
卿卿表示之前以私人飛機做貸款的債務，早以1,400萬美金解決，惟該財團沒有將飛機歸還，遂向該公司提出訴訟，並即場提供相關的法律文件。至於有指胡兆明的網上上市公司破產，她說：「做生意有時賺有時蝕，係蝕咗2,000幾萬美金，但係對佢嚟講蝕得起！佢哋淨係攞我哋蝕嗰啲嚟講，以前賺到笑又唔講！又話我去超市收銀，諗吓有冇咁嘅可能？」
抱歉連累家人
之後卿卿再就私人追討、被指是蚊型銀行、賣屋還債、胡兆明名下Victoria Tower估價等四點逐一反擊。對於銀行被指是「蚊型」，她顯得有點勞氣：「到今日為止銀行有50個員工，總面積接近2萬呎，咁多年都有錢賺，從冇蝕過錢！」說到這裏，她再次強調：「會採取法律行動，唔單只私人名譽上，甚至銀行都會，先生已經喺美國搵律師研究，香港都會搵律師。」卿卿又直斥周刊連她的大宅照片亦搞錯！當她提到事件影響家人時，更開始眼泛淚光：「因為It's not worth it！（咁樣唔值得！）要畀咁多麻煩畀家人好唔值得，今次返嚟係睇媽咪，唔係為賺錢養家！」她表示對於今次返港拍戲絕不後悔，但拍完今次可能不會再拍。
文：專案組