林曉峰傾慕o靚嫂 老婆震怒

戚：舊年真係好開心，好鍾意同你兩個合作，記得去年你哋一嚟排戲就已經背熟晒劇本，有備而戰，仲創造咗個角色出嚟，好多人話你哋係重點，反應好熱烈、好成功。今次再重組演出都諗你哋好忙，加上又係慈善冇錢，都驚你兩個唔睬我哋。

梁：好多謝三嫂，上年做完多咗人認識，工作量亦明顯增加，所以今次莫講話慈善，總之三嫂叫到就一定義不容辭。今次我會變本加厲，將自創嗰段加長啲，務求令後面嘅戲縮短，真係好不負責任嘅做法，哈哈。

賢妻良母型的三嫂，卻保持年輕心境。

唯唯難得有機會踏上舞台演出。

林：唯唯真係好有心機，有啲時事、熱話佢都會放落去。

阿Lo讚三嫂仲好似個o靚妹，老婆康子妮詐晒型。	賈思樂（右起）、阿Lo、唯唯、盧海鵬、大姐明與戚美珍大鬥演技。	阿Lo跟獎門人志偉、錢嘉樂爆笑最叻。

梁：其實我唔係好有心機，求其抄啲新聞落去就算o架咋。

戚：記得三哥拍劇時我去探班，佢埋位就冇人理我，咁咪同唯唯傾偈囉，言談間發現你係個好正面、好有才華嘅年輕人。女朋友角色我就冇得做o架啦，我都好期待做你阿媽，但一直都冇機會，所以有個舞台劇就叫啲幕後黑手搵你做，不過佢哋唔熟你哋，都擔心我哋三個做得唔好，幸好不負眾望。監製金廣誠起初當唯唯新人，靜靜雞問我你得唔得，我話得o架呢，到對稿嗰日已經冇人再對我發問題！

林：其實當時監製喊晒，因為佢feel so sorry！

梁：難怪監製有幾次對我欲言又止啦，原來佢想同我講sorry，哈哈！

戚：睇你兩個咁搞笑，其實好專業，之前同阿Lo唔係好熟，只係食飯撞到，舊年同你排戲時有句說話令我好深刻，對完稿你係第一個好認真咁問監製有冇問題，新演員問意見唔出奇，但你做咗咁耐好有經驗，仲咁謙虛認真，搞到我都叫自己唔該做好啲咪甩鬚。

女版梁朝偉發電

戚：記得嗰場戲講Louie（賈思樂）覺得自己就死，所以喺街求其捉兩個麻甩佬畀我相睇，等我下半生有人照顧，大家就諗不如反差大啲，搵兩個後生好多嘅，段戲就會好笑，咁又要搵搞得笑又精靈嘅，於是就諗起你兩個。

林：但上到台我年紀就大你好多，今次合作令我印證到好多人話你係個好In嘅媽媽，因為三嫂認識嘅嘢同言行，都係個o靚妹嚟！所以有外國朋友都叫我介紹嗰個「o靚妹」畀佢哋識！跳唱中途你拖住我嗰吓，我直頭夢想成真，拖住個小花幾開心呀！睇番片原來我唔多望你，因為你係女版梁朝偉，對眼發光發亮咁！私下我都唔敢約你，因為我太太嬲得好緊要，佢話：「你咁唔得，因為三嫂有三哥！」

戚：哈哈，加多啲車馬費畀你啦！不過識咗你兩個之後好失望，演技咁勁，我叻唔過你哋！

梁：實在太客氣啦，其實一向知三嫂做嘢認真，呢套劇我哋純粹搞笑，但你有真摯情感嘅戲要做，要穿越搞笑同深情之間，都轉得好快、好投入，真係好犀利！私下仲成日黐你同三哥餐添。

戚：唔好咁講，你都有請我哋食飯。

以鵬哥作榜樣

戚：同新人合作感覺好好，作為觀眾睇你同志偉做《獎門人》我覺得好好，演員有時唔需要分類別或年紀，其實撈埋大家都係專業嘅，志偉係最老o架嘛，但同你哋玩完全冇蝕畀你哋，既然獎門人都可以，我覺得《蝦仔爹哋》都可以，鵬哥有冇玩你哋呀？

林：冇喎！以前睇電視成日見你同鵬哥、大姐明、Louie，到我喺電視城一齊做嘢最初都有少少驚，但今次做完《蝦》之後，人人都話鵬哥整蠱人，佢邊會整蠱人啫，簡直好到不得了！

梁：開頭啱啱做《蝦》見到鵬哥都有少少距離，但排完第一場戲之後，佢已經對我哋好慈祥，仲會睇晒咁多個人做乜，鵬哥都唔係亂咁試人咪。

林：所以點解三嫂話我哋嚟到戲已經排好晒，梗係啦，鵬哥喺度嘛！記得啱啱入行嗰時，獎門人同我講做乜都好，睇下鵬哥，排嘢時佢成日翹手喺側邊睇，睇完就會搵位爆，咁就要打醒十二分精神。所以我永遠企喺鵬哥後面睇吓佢睇乜，排完佢仲會走埋嚟話呢度應該咁喎，大家就好自然做得仔細啲。

戚：其實人多場面亂，鵬哥係想幫導演留意佢睇唔到嘅問題，之後再同導演講，係佢咁嘅分量先做到。啲前輩對你哋真係好讚賞，如果有機會再做，你哋點都係我哋嘅最理想人選！

戚：戚美珍　梁：梁烈唯　林：林曉峰