莫文蔚祖狄羅約埋歎啡

嫁作人妻後Karen近年經常港、英兩邊飛，前晚她獲邀到北京出席酒類品牌活動，同場還有英籍荷李活型男祖狄羅和台灣藝人吳佩慈等。

讀書時期已於倫敦留學，現跟丈夫定居當地的Karen，對英國自然特別親切，故此在活動中跟祖狄羅碰面時，雙方雞啄唔斷般，有說不完的話題。Karen說跟他傾偈後才發現，原來大家同住倫敦之餘亦是鄰居，雙方的寓所距離十分之近。

祖狄羅又向Karen透露，平日不用工作，最愛到寓所附近一間咖啡店歎咖啡和看書，Karen笑言聽到他介紹後隨即會心微笑，然後向他表示自己亦是該咖啡店的常客！她說：「我講完畀佢聽之後，大家都一齊大笑，佢話估唔到咁巧合，大家都鍾意去同一間咖啡店，仲約定我下次返英國時，要一齊去飲咖啡！」

捱冷坐馬車

Karen稱今次雖然是首次跟祖狄羅見面，但自己向來有留意他的電影，大讚他演技出色，又透露最喜歡他的作品為《A.I.人工智能》和《誘心人》。

活動舉行地點是正值踏入寒冬的北京，大會更安排一眾嘉賓在戶外乘坐英式傳統馬車進場，以一襲黑綠色復古連身紗裙亮相的Karen，在寒風刺骨的戶外坐馬車，自然凍得牙關打震，她說：「件衫雖然好靚，但因為係紗裙，太薄，着咗好以冇着咁，好彩只係坐咗一段路就返入室內。」

文：音樂組