Rainbow拖型男夜蒲醉熱情
o靚模胡心諾（Rainbow）最近飛甩過從甚密的同性密友Miho，轉黐高大靚仔新歡，日前Rainbow帶新歡夜蒲，全程翹實男友滿場飛，不停向友人示威，離開時Rainbow再施冧功，十指緊扣兼送波餅，後與男友拖到實上的士走人。
現年20歲的o靚模Rainbow，出道4年以來戀事不多，但自從今年初傳出遭經理人兼男友Admond狠飛後，Rainbow一度和富家女同性密友Miho出雙入對，兩人不避嫌在網上大騷親熱咀嘴相，即時令Rainbow性向成疑，及至近月兩人關係有變，Rainbow不時被目睹身邊另有一名高大靚仔新歡出現，日前兩人又再結伴夜蒲。
貼頭傾偈
當晚Rainbow穿短裙上陣大騷長腿，與高大新歡聯同數名友人齊齊進入夜店，雖然一大班人玩，但Rainbow全程以女友姿態黐實新歡，兩人如同連體嬰般，不時頭貼頭傾偈，其間新歡用手機發短訊，Rainbow亦挨近(目及)到實。高大新歡對Rainbow的貼身癡纏相當受落，一度拖到實陪她往洗手間，有仔相伴的Rainbow難掩一臉自豪。
眾人蒲至凌晨3點半，Rainbow和新歡先行離去，兩人十指緊扣步出，行到樓梯時，Rainbow再施冧功，用另一隻手捉實對方手臂，將身體緊緊貼在其身上，有意無意送上波餅，兩人隨即上的士離開。
否認拍拖
記者致電Rainbow，問她是否拍拖？她即緊張地說：「普通朋友嚟啫。（有冇發展機會？）朋友囉，唔講嘞，（但影到你哋拖手喎？）可能自己飲咗啲酒，熱情啲啫，當晚我啲中學同學都喺度。」
文、攝：追蹤組