胡定欣舞慶東華吊高晒腩
無綫花旦胡定欣昨晚為慈善節目單拖表演舞蹈，穿上露腰舞衣雖然性感，不過也不及腰間贅肉吸睛度高，定欣尷尬表示拍攝外景，惟有以威吔勒肚修腰線條，對於年前鄭希怡（Yumiko）於同一節目表演倒吊時甩褲春光乍洩，伊人揚言冇有怕，更指舞衣扯極都唔甩。
慈善節目《歡樂滿東華2012》昨晚於將軍澳電視城舉行，展開歷時7粒鐘的籌款演出，當中有曾志偉率領許亦妮、張秀文、朱千雪、袁嘉敏等後輩演出的「六國元帥賀東華」、林子祥、趙增熹合作的「神級熹祥星SING升」、胡定欣孭飛的「天外飛仙揚善欣」及鍾麗淇、黃佩霞、李雪瑩等的「扭扭擰擰YOGA QUEEN」等，何鴻燊太太陳婉珍及女兒何超雲亦有出席。
舞衣扯唔甩
剛於過去一星期連奪兩個「最佳女配角」的胡定欣，昨晚更被安排單拖上陣表現舞蹈，身穿紅色露腰舞衣一臉風騷，不過卻被腰間贅肉大殺風景，定欣透露為了該項表演練習一星期，她謂：「因為要倒吊半空，吊到觀眾水平線，平時練習都冇咁高，（係咪肥咗？）係呀！之前去完《衝上雲霄II》外景肥咗返嚟，不過一陣吊威吔會勒住個肚，可以順便修埋條腰（驚唔驚似Yumiko咁甩褲？）唔驚，件衫好安全，點扯都唔會甩（咁會唔會倒奶？）絕對唔會有呢件事發生！」而表演期間，定欣左腳腳趾公不慎踢到鼓，結果令其啫喱甲脫落兼流血，事後她笑言沒有大礙，演出總算有驚無險。
處女演大戲
而許亦妮與朱千雪則以大戲妝出現，前者身材向來出眾，故即使穿上大戲服，仍難掩波濤胸湧感覺，透露此乃處女下海演出，她謂︰「第一次化呢啲妝，好似老咗。」朱千雪則謂：「覺得化呢個妝隻眼大咗，以前喺電視見到呢啲大戲妝好驚，依家到自己化又冇嘢。」
至於梁政珏則負責參與「魔法幻影MAGIC TEAM」表演，表示為該項目練到手腳瘀傷，更指已為其性感服飾做足防走光措施。
文：影視組