周潤發欽點祥仔杏兒稱帝后

國際影星周潤發、吳鎮宇、內地影星袁泉、童菲、莫小棋等，前晚出席《瑞士天梭表‧大上海‧仁愛堂蔡黃玲玲教育基金慈善夜》，有份參演的黃曉明因腳傷未有到場，但仍透過短片支持，還以發哥《縱橫四海》坐輪椅造型致敬。

笑志偉經常飲醉

問發哥對今屆《萬千星輝頒獎典禮》中的視帝視后有何心水？他說：「大熱咪黎耀祥啦！女仔胡杏兒同楊怡嘛，但我睇楊怡後期多啲，返嚟亦只睇到徐子珊結局，佢吸毒嗰場都幾好。（強姦嗰場呢？）好少之嘛，好似楊怡長少少，佢都有畀人強姦o架！（咁劉松仁呢？）好，點解唔好？但佢好似唔係親生仔喎！（林峯係親生仔。）黎耀祥都係親生仔嘛？男配角應該係古明華同陳國邦啦，演藝學院鬥演藝學院；女配角就係江美儀啦！」

黎耀祥被發哥睇好攞視帝，徐子珊的吸毒戲亦被讚好。（資料圖片）

發哥（左）捉實導演劉偉強雞啄唔斷，非常老友。

提到曾志偉捲入與黃浩的紛爭，發哥笑言志偉經常飲醉酒。記者指他身形瘦了很多，發哥表示將會與謝霆鋒合作王晶新片，並大讚霆鋒身材好弗，自己亦要減十磅八磅。

內地女星胡然有份出席活動，大讚發哥有魅力。

袁泉（右起）、莫小棋及童菲雖然盛裝赴會，但始終被發哥搶盡風頭。

吳鎮宇鬥Chok認輸

同場的鎮宇與發哥合照時表現恭敬，其後二人在台上鬥Chok。早前鎮宇與胡杏兒的粉絲在微博罵戰，他解釋 ：「冇呀！只不過好多粉絲留言係《衝上雲霄Ⅱ》以外嘅事，咁不如叫佢哋去番自己嘅地方發表，我想我啲留言乾淨啲。」之後他又承認與發哥鬥Chok一定輸：「我同朋友講同周潤發合作電影，但自己做反派，朋友問『咁你仲想點呀』。」他亦笑言若有機會與發哥調換角色，自己亦受不起。

文：影視組