黃浩新版本吸毒片變搬汽水

近期全城關注的藝人集體於食肆吸毒事件風波愈鬧愈大,事件源頭黃浩前晚首度開腔,之前強調有藝人在其餐廳吸毒的他,明顯把焦點放在「濫收費用」上,欲淡化事件,態度180度改變。他訪問時多次以受害人自居,強調自己被動及委屈。

黃浩聲稱原本只是有關濫收費用的爭拗,以為去年已經解決,但想不到事件會演變至此,他說:「我冇睇過任何人喺我間餐廳內做犯法嘅行為,只係有人投訴我哋濫收費用,我針對呢件事,睇番閉路電視,睇番原來係員工搬汽水出入。件事已經超越咗我應該承受嘅範圍,唔應該發展到咁。呢兩星期我好委屈,我見到自己畀人整蠱,有啲人做咗啲嘢,影響到我家人安全同受到威脅。件事被放到咁大,我已經息事寧人,我做埋和事佬幫人解釋,但冇人認同,反而將所有事推喺我身上。我做錯啲乜?如果我有錯我會承認,我冇整蠱過任何一個人,冇公開傷害或誹謗過任何一個人。」連日來高調現身的黃浩夫婦,經前晚的圍訪後,至昨日截稿前仍「潛水」。