羅霖黎淑賢劈炮仁美 黎燕珊暗寸多此一舉

前亞姐羅霖早前宣布與丈夫劉坤銘分居，並傳出她與年輕異性過從甚密，惹來「仁美清叙」（簡稱仁美）的會長黎燕珊不滿，指身為仁美主席的羅霖貶低亞姐形象，因而引發兩女罵戰。昨日羅霖、余安安、馬詩慧、黃佩霞及陳祉妤等出席美容活動，羅霖自爆已辭去仁美主席一職，而副主席黎淑賢亦同時辭職。

做善事多途徑

抱恙在身的羅霖表示，婚姻、小朋友及仁美的問題已處理好，她說：「仁美件事已平息咗，冇問題。我已經辭咗職，遞咗辭職信，其實個任期係做到12月底就滿。（就快滿都辭職？）正常要遞信畀（仁美顧問）葉家寶，等佢哋早啲知有準備，我做咗兩年幾主席，一切都上晒軌道，風雨都過去，我係基督徒，所有事都覺得唔係好大件事，好多嘢係一個誤會，我同珊姐（黎燕珊）都要照顧屋企，我覺得冇必要再有無謂嘅煩惱。（仁美再搵你，會唔會幫手？）梗係會再幫。（有冇留戀？）同朋友傾過，做善事唔一定要喺仁美，喺其他地方都可以做到，最緊要自己開心，我做主席唔係為名利。」至於婚姻問題，她稱現分居中，小朋友由二人共同撫養。

黎淑賢承認已辭去副主席之位。

黎燕珊（左三）與葉家寶（右三）率領一班亞姐為慈善出力。（資料圖片）

辭職專心湊仔

另外，黎淑賢昨日接受電話訪問時，承認已辭去仁美副主席之位，她解釋：「我日前向葉家寶email辭職，係以私人理由辭職，因為兼顧唔到，我喺今年七月尾任職，係頂替羅麗莎個位。（有人逼你辭職？）呢個世界邊有畀人逼，係自己唔做，想專心湊仔。（太多是非而心淡？）唔會，入去一心為做善事，可以用其他方法做。（結果同初時諗法唔同？）有出入，所以唔做，初時諗得太簡單，原來要兼顧好多，怕做得唔好，畀機會師妹。（羅霖都辭咗職。）有聽過，但唔係同佢夾埋，大家都係想做善事，唔做係為小朋友。（有冇挽留你？）我冇同黎燕珊通電話，葉家寶亦冇回覆，我當佢接受咗。」

黎燕珊對於羅霖辭職一事大表愕然，她坦言不知情：「佢交咗信未？佢向邊個辭職？正常程序係由秘書長處理會務文件再向會長匯報，但我冇收過。佢早前私下發過短訊畀我，話需要多啲時間去照顧家庭，佢應該要循正式手續去做。其實上個月尾開會，佢都有列席，已經講咗12月28日會重選所有職位，佢仲使乜辭職。」

文：名人組