何紫綸誓要活得精彩

由同居密友變成分居朋友,過程或許很煎熬,但會過去的。模特兒何紫綸(Ann)細訴與張栢芝胞弟張豪龍的九年情時,以過來人身份跟大家分享,因為時間沖淡了舊日的傷痛,今日的Ann,有了新生活,未來工作亦滿腹大計,誓要活得比任何人都好!

《愛情篇》:愛過方知緣盡

Ann最為人熟悉的一段情,莫過於跟栢芝胞弟豪龍拍拖九年,惜最終分手收場。重提這段情,Ann不再傷感,直言雙方拉鋸多時,期間似是心願未了般難受,到真正分開初期,她因為食欲不振而暴瘦,及至醒悟,方知緣盡不可再追。

同佢第五年開始成日嘈,一齊咗三、四年開始同居,第一年係好開心嘅,好期待返屋企,第二年開始唔得喇,期間我洗衫煮飯打掃,做到嘔咁滯,雖然鍾意,但日日做好攰,冇咗自己,好似癲婆咁,嗰段時間冇咗吸引力o架。開始大家望住電視冇嘢講,好似冇新話題,開始嗌交,七年之癢嚟啦,又冇諗住結婚生BB,咩事先?咁咪離開囉!最終咪因了解而分開囉,朋友話冇和平分手呢樣嘢,其實真係有。

唔識放手

失戀後我會搵人傾,因為我怕悶,但唔想食嘢,我明白狠狠地失戀,啲飯喺你面前就係唔想食,結果暴瘦,自己不停反省,中間有拉鋸時間,但點樣去放手呢?真係好難,惟有同自己講下一個會更好,如果只顧以前,眼前嘅事業同生活就會冇晒,嗰時唔識得放手,成日愁眉苦臉,冇心機工作、唔開心,個樣會好明顯,但一旦醒咗呢,啲正能量返番嚟。

我哋都拉鋸咗好耐,有時可能幾個月嘈一次或半年一次,搞到個心好似有事未了咁,但又唔知咩事。有時愛一個人未必完全得到,反而做番朋友,個感覺可能最真摰,有時好着緊去挽留一個人,對方會覺得好煩,反而變成敵人。我慢慢將個關係疏離少少先啦,慢慢可以做好朋友,開頭就忍住唔想搵佢,但如果一分手就搵對方,咁就麻煩,大家係需要時間去cover。要放開自己識下一個,識咗下一個,以前嘅嘢就會慢慢唔記得,當然唔可以濫交,我係寧缺勿濫,可以識男仔,但唔好今日A,聽日B,咁係好空虛,時機一到,真正愛你嘅人就會出現。

《性格篇》:躁底王大洗底

自認個性刁蠻的Ann,坦承小時候很霸道,拍拖又要大晒!更試過因公主病發作激走當時的男友,到長大了才知道自己「乞人憎」,反省過後,才造就今日和善的個性。

可能我排第四嘅關係,由細到大任性刁蠻,係躁底王!小小事我都會好忟,忟完就冇事,但相對喺拍拖關係就唔work,頭一兩個男朋友就係咁畀我逼走。記得有一次去機場搭飛機,臨上機我突然公主病發作,唔知咩事話唔上機,仲想撕爛張機票,最後佢控制到我,冇事成功上到機。但我郁啲發脾氣,覺得自己大晒嘅態度,接觸多咗人之後發現咁樣唔work嘅,啲人開始覺得我乞人憎,唔想見到我,然後我開始反省。

拒一夜情

之後同張豪龍的九年情,呢段深刻嘅感情太長啦,由細經歷到大,一齊畢咗業做嘢,大家經歷到原來拍拖唔係咁嘅樣,我刁蠻佢唔會理我,我覺得:「死啦,點會咁嘅呢?」佢開始同我傾,要坦誠相對,大家都火爆,為小小嘢爭執係冇用o架!但磨合咗咁多年,最終都唔一齊,可能真係緣分已盡啦。失戀嗰段期間仲變到好憎男人,對啲男仔好衰,例如佢哋請我飲嘢,我試過同朋友買最貴嘅香檳,然後喺佢哋面前倒晒佢,我冇錢買咩?我自己跳舞,啲仔就喺後面好似禽獸咁,纏住唔知咩事,邊個女仔得就「埋牙」想玩一夜情,但我會保護自己。

《工作篇》:新人遭「單打」

從17歲入行至今,Ann曾遭到同行前輩的白眼,「單打」她不懂行天橋,但她未有氣餒,除了努力學習行貓步外,亦深明自己賣點不是豐滿上圍,故從沒想過跟潮流「加建」身材!

做咗呢行咁耐,梗係試過畀同行睇唔起啦!第一次行騷,我唔識得行,但公司突然叫到,死啦我連轉個圈行直線都唔識喎,綵排時有個依家仲喺呢行嘅前輩model寸我,仲反我白眼同我講:「都唔識行catwalk嘅!」令我印象好深刻。嗰時我都幾尷尬,全部模特兒一排過,個導師仲要講明陣間點樣行,嗰陣我得17歲,已經好驚,未開騷就去咗後台喊,結果咪真係行得好衰!所以咪慢慢去學習。

引仔秘笈

依家model嘅身材成為焦點,但我冇諗過喺身材上做手腳!行天橋嘅model其實唔好咁大胸,太大designer唔鍾意,但你畀我大番少少都OK嘅,哈哈……但我只係sell骨感同對腳,如果視覺效果太大,啲人就會focus咗身材唔理件衫,所以model真係要好瘦o架,除咗要sell內衣、泳衣嗰啲外國model先身材豐滿,不過佢哋唔做騷都着得好密實。一個女仔唔賣弄性感就永遠都有神秘感,先會令人想睇佢多啲,同拍拖一樣,你成日袒胸露臂去蒲、去clubbing,啲男仔可能覺得你只係想玩一夜情,反而唔想同你發展,所以我建議女仔唔使刻意性感,可以有少少風騷,散發女性韻味,再加談吐眼神已經足夠吸引男仔。

媽咪催婚

已屆適婚年齡的Ann,媽咪年紀大,婆婆又過身,特別是家姐剛生了BB,當然有向她催婚:「因為我兩個家姐嘅婚姻唔係咁好,媽咪寄託晒啲希望喺我身上,全副心機喺我度,令我有無形壓力,但我唔會對住屋企人喊,唔畀佢哋知我唔開心。見佢多咗好多皺紋,又成日腳痛,我就好心噏,好珍惜同佢嘅時間,都希望快啲生番個BB畀佢湊!」

後記

Ann一向給人硬朗的感覺,縱使失去一段刻骨銘心的感情,仍能瀟灑面對,惟受訪期間,提及身體欠佳的媽媽時她一度眼泛淚光,還說現時最大的心願是置業,希望讓媽媽住得更舒服,可見Ann是名絕頂孝順女,親情,果然是最重要的!

口述:何紫綸 

筆錄:李惠儀

攝影:劉智源

場地:Arthur Lam