葉玉卿：老公仲想我生

嫁往美國當少奶奶的葉玉卿息影已有16年，今年突然回流香港，接拍曾志偉監製的賀歲片《我愛HK 2013恭喜發財》，其片酬、經濟及夫婦二人的感情問題即時傳個不停。卿卿接受本報專訪逐一解畫，自言是次回港最主要是探望媽媽，她說：「我媽咪因中風致半身不遂，肺部又發現有腫瘤，但係咪癌已經唔重要，因為佢已經九十幾歲，身體愈嚟愈弱，前後發生咗九個月，我哋十一個兄弟姐妹，其中一個姐姐已經去世，大家輪流照顧媽媽，早前我偷偷返港去睇佢兩次。媽媽活動唔自如，曾經去過兩次急症，依家喺屋企，我買晒病床，醫院需要嘅儀器都買返去用，廁所都改裝埋畀媽媽用，已過咗擔心期。佢依家狀況唔係咁清醒，好似變番BB咁，我幫佢沖涼抹身換尿布，好震驚媽咪有咁嘅轉變，所以依家想抽多啲時間陪佢。」說罷卿卿禁不住感觸落淚。

象徵式收酬勞

適逢老友志偉及樂易玲極力游說她復出，故她才以玩票性質客串6天戲份。有指其片酬約二十多萬港元？她聞言失笑說：「三倍都唔止啦！我今次嘅片酬同當年嘅片酬係一樣，我三個仔女，每年淨係學費都要120萬，今次返嚟我坐頭等位、住海景套房，又工人費，咁嘅片酬，夠我乜嘢開支？如果咁嘅片酬可以救我哋一家，咁邵氏真係唔錯。（象徵式收片酬？）對我嚟講係，對邵氏就未必係。」她更強調是次回港費用全屬自費。

談到與老公胡兆明的感情問題，卿卿坦言結婚16年，當然有過平淡時期，直至現在子女漸長，老公就要求希望跟她再過二人世界，卿卿甜笑謂：「老公想過二人世界，但我個大女非常黐身，我返咗嚟一日，佢已經喊住話要過嚟搵我，佢連瞓覺都要黐住我同老公中間，所以我真係畀唔到時間老公，但我會珍惜老公咁嘅要求！」已是三子之母的卿卿還被老公要求再懷孕，她續說：「我同老公未結婚時，佢見到小朋友都會逗佢哋玩，佢真係好鍾意小朋友，而且係一個家庭觀念好重嘅人，所以就算我今時今日四十幾歲，佢都仲希望我生多個！」她坦言婚變傳聞，確實令老公擔心，但時間可以證明一切。卿卿更踢爆廿四孝老公本來要飛上海，但卻專程停留香港陪她吃頓飯才起行，飛畢上海又會再來港陪伴她，認真癡纏！此言一出，實行以曲線否認情變。

身家依然過億

至於卿卿的經濟狀況，會否因美國經濟衰退而受影響？卿卿直說：「美國經濟的確差咗，係有啲影響，但都係數字出入，以身家過億嘅人嚟講影響唔大，我哋使嚟使去，都係表面嗰層，我有嘅嘢依然喺度，古堡繼續有，銀行超市都運作正常。」日前卿卿就被拍得與老公由中環餐廳步出，二人齊齊登上座駕直返酒店，當抵達酒店後還大方讓記者拍照，動作合拍，果然恩愛。

場地：九龍海逸君綽酒店

文：名人組