李曼筠託搵筍盤唔要魔術師
歌手李蘊被國際著名魔術師Nathan Burton在魔術表演中，先催眠再將她懸浮空中，可謂神乎其技。談及她早前到美國接受魔術訓練時，與任職銀行的男友羅章冠慶生及預支蜜月，她甜到漏謂旅程開心，令單身的李曼筠（Maggie）大感羨慕，着李蘊介紹「筍盤」，但拒愛魔術師，暗寸傳劈腿的李蘊舊愛劉謙。
昨日李蘊和Maggie化身魔術女郎，與魔術師Nathan Burton（彌敦貝爾頓）在商場表演魔術，為明年農曆新年舉行的《彌敦 貝爾頓魔幻之旅2013香港站》宣傳。企在櫈仔上的李蘊，先被魔術師緊緊抱住，受催眠後雙腳離地，其後單靠一支光管支撐，全身橫浮半空，相當神奇。李蘊和Maggie表示早前在美國學魔術期間，已洞悉魔術秘密。
問李蘊覺得Nathan和前度劉謙相比，哪位魔術更勁？她說：「我唔會作任何比較，因為每個魔術師表演方式不同。」有指李蘊和圈外人男友到美國預支蜜月？她直認：「成個旅程好開心，不過我唔係咁適應時差，有啲頭痛，（係咪頭痛點同男友慶生？）唔係，我都要做嘢。」
盼有男友撐枱腳
Maggie就大表羨慕，並爆料謂：「我都好想有男友嚟探班，我就嚟出書，想有男友幫我影相，陪我食飯。」有謂可叫李蘊介紹金融界「筍盤」？Maggie哈哈笑：「好呀，不過我唔要魔術師。」另外，李蘊和男友分別在微博上載旅行相，洩漏把臂同遊的行蹤。
文：音樂組