杏兒覺「有機」 黎耀祥等翻「閹」
藝員黎耀祥、胡杏兒、陳豪、郭晉安昨日到電視城出席「萬千星輝頒獎典禮2012全民投票」記者會，現場預演「公投」由約半百藝員選出「最想咀咀主角」，為一人一票選出的「最佳男/女主角」試水溫，結果被看低一線的杏兒以十五票力壓得十四票的楊怡。杏兒抽出投她一票的梁烈唯（唯唯），兩人開心得當堂抱抱，唯唯笑言自小已看杏兒演戲，杏兒也吻賀唯唯預祝他奪得「飛躍進步男藝員」。
事後杏兒說突然間覺得自己可能有機會爆冷：「喺討論區我都係最高票數，盡力啦，依家心情都好平靜，上年都攞過。」TVB臨時開記招有撼城電之意，杏兒坦言前日才獲通知需要出席。
黎耀祥現場拉票指《大太監》反應好有機會開續集，笑言再翻「閹」多一次：「如果贏咗真係好大機會開續集嘅。（點拉票﹖）等我同超市傾吓派現金券囉，講笑啫。」說到選情告急，要看觀眾選擇，希望投票率創新高有指標性。