陳豪臨急殺敵KO魔童

無綫、亞視、城電及nowTV為免費電視牌照之戰連月來連環出招，當中以城電（CTI）最為進取積極，昨晚更於尖沙咀某酒店舉行《一個電視台的誕生—新台命名‧節目試映禮》，除有「城電魔童」王維基外，一眾CTI藝人空群而出，黃日華、林嘉華、廖碧兒、張可頤、林文龍、鮑起靜、劉美君、李璨琛、關楚耀、唐寧、梁小冰、楊淇、石修、夏雨及「外援」陳嘉桓等過百藝人進行大晒冷，不過大部分藝人均知名度欠奉，故即使人頭再多，都不及無綫「臨時拉伕」、僅有60名藝人出席的《萬千星輝頒獎典禮2012》全民投票活動般人強馬壯，再加上前無綫總經理陳志雲因「臨時有重要會議」缺席，城電是次晒冷活動更見失色！

一線花旦小生齊撐

無綫助理總經理區偉林台上透露，是次活動是臨急臨忙才發通告通知藝人出席，但不少一線小生花旦包括楊怡、羅仲謙、謝天華、郭晉安、胡杏兒、黎耀祥及陳豪等均仍有抽空撐場，再加上陳煒、伍姑娘、張兆輝，及最近人氣急升的梁烈唯及古明華等，論吸睛度及知名度遠勝城電數條街。區偉林直認籌備活動時間緊絀，並向藝員耍冧謂：「要同啲藝員講唔好意思，（你哋）當係通知又好，當係威逼又好，咁短時間發通告要大家出席。」但區偉林受訪時卻否認硬撼城電，更強調是因之前在馬來西亞的頒獎禮中獲取佳績，才決定昨日舉行活動慶祝。

無綫雖然臨時拉伕，一眾上下一心更贏盡名氣。

王維基（左三）領軍大晒冷，無懼TVB狙擊。

縱然無綫不費吹灰之力便將城電擊倒，但王維基依然未感氣餒，他昨晚致辭時大吐搞電視業辛酸史，並謂自己贏盡民意博取更多認同：「呢條路（搞電視）真係好唔自在，辛酸同壓力不為外人道，我問心無愧，好唔忿氣點解香港優勢愈嚟愈少？所以我要發揮電視業！有人話我要嘅人都係嚟自同一個機構（無綫），係呀！如果唔係人哋都唔會咁鬧我，佢哋以前喺動物園，依家喺大森林，以前係踱步，依家係奔跑。」

胡杏兒（右）賀楊怡贏得馬國視后。	郭晉安（圖）及謝天華抽空支持TVB。	謝天華

黃日華抗議寸無綫

王維基藝人則施展渾身解數表演暗寸無綫，黃日華棟篤笑環節揚言若政府再不批發電視牌照，他便會去政府總部暴飲暴食以示抗議：「革命係需要犧牲嘅，就算少咗我一個，後台仲有幾百人撐佢！」余慕蓮「接棒」說：「以前（無綫）成日叫我做垃圾婆同醜角，今日我終於扮得靚靚！」王維基接受傳媒訪問時亦直言唔怕無綫「追住嚟打」：「我覺得呢行需要刺激，呢個行業沉寂咗好耐。」對於無綫晒冷「還拖」，他亦從容謂：「好事！有競爭先有進步。」他又指望明年3月能獲發牌照，及從未聽過有員工有離巢返回無綫之意。

黃日華與女兒悉心打扮到場。	有人戴上仿真面具扮王維基跳舞，笑爆全場。	姜麗文（右）和張雪芹咀嘴意識大膽。

昨晚現場共播放了十多套劇集的片花，但卻略嫌暴力血腥兼色情，除有劉浩龍與不知名男演員咀嘴，廖碧兒更脷舔蘇永康，更有姜麗文嘴同性演員，尺度大膽。

文：專案組