嘉欣煮聖誕餐質飽伍允龍

藝員鍾嘉欣和陳茵媺昨日分別出席不同商場的聖誕活動搵真銀,講到聖誕節,慳妹嘉欣想要光波煮食機作聖誕禮物,她坦言會請緋聞男友伍允龍充當「白老鼠」試食,而陳茵媺則提示男友陳豪聖誕送花。

鍾嘉欣到馬鞍山出席商場聖誕活動,這個慳妹表示想要的聖誕禮物相當實際,自詡廚藝不俗的她希望得到光波煮食機當作聖誕禮物,打算炮製牛扒、意粉挑戰高級餐廳水準。問到嘉欣可會請緋聞男友伍允龍試食?她笑說:「都可以o架,我都要搵好多人做白老鼠,但係聖誕都未知使唔使開工,開工就叫pizza。」嘉欣密練廚藝否認是為做好人妻作準備。

戰衣超密實

正忙於為劇集《巨輪》拍攝的嘉欣稱靠演技不靠化老妝演繹40歲角色,雖然忙拍劇但她也準備好「戰衣」出席台慶頒獎禮,不過,她卻預告服裝超級密實,她說:「以前出席頒獎禮都驚走光,今年希望着得自信、舒服些,自己提議着樽領衫、連腳都唔露,如果大家唔滿意就喺條裙度剪個衩。」嘉欣講到得獎信心,說:「都係睇多,如果有surprise就當bonus。」另外,前晚嘉欣在《勁歌優秀選》得獎,講到陳法拉沒獎?她說:「自己唱歌唔係同人比賽、比較,只係做自己鍾意嘅音樂。」若然「視后」有閃失,無綫會否以音樂獎項補償,她說:「呢啲幕後決定,唔到我哋去諗。」

獎項唔重要

至於與陳豪拍拖兩年的陳茵媺也到屯門出席商場聖誕活動,她讚男友夠浪漫,但向來重視聖誕節的她還未想到送甚麼禮物給男友,因為男友甚麼也不缺。問陳茵媺想收到陳豪甚麼聖誕禮物?她說:「最緊要係有心思,我鍾意花,收花都唔錯。」問獲提名台慶「最佳女主角」及「最佳女配角」的茵媺可希望得獎當作聖誕禮物?她說:「自己唔太着重獎項,反而希望有唔同嘅角色挑戰自己。」

採訪:影視組