阿嬌首開腔 未收「我愛你」
鍾欣桐（阿嬌）繼兩位好姊妹蔡卓妍（Sa）和容祖兒後，戀情亦宣告「有着落」，被《好報》率先披露有位韓籍男友K先生，昨日阿嬌對剛萌芽的「嬌K戀」顯得處處保護，但還未獲男友對她說句「我愛你」。
阿嬌昨日聯同一眾英皇歌手容祖兒、阿Sa、陳偉霆、羅力威、鍾舒漫、泳兒、湯怡等到大埔參加「親親寵物健步日」。阿嬌首度回應「嬌K戀」，態度依然「口密」，問到男友K先生姓氏？阿嬌竟謂：「我唔知佢姓咩喎！（咁你叫佢咩名？）唔會話你哋聽。」在旁的阿Sa即幫口解畫：「阿嬌意思係盡量唔講咁多感情嘢。」
至於阿嬌稱與K先生拍拖數月，算是朋友介紹認識。問到如何與男友溝通？阿嬌謂：「英文囉！（有冇教你簡單韓文？）少少啦！（有冇同你講韓文『我愛你』？）未講喎。」可擔心冇時間拍拖？阿嬌謂：「時間可以就嘅！（男友知你係Artist？）唔好玩啦，佢知道。」阿嬌承認沒想過戀情在短時間內曝光，但認為也不算壞事，男友亦早有心理準備。
趁機宣傳新片
日前阿嬌在微博大晒幸福留言說「愛情不NG」，阿嬌對此笑謂：「係部戲嚟o架，趁機做下宣傳。（呢句說話同K先生講？）講佢都唔明啦。」問她可會擔心韓國男人很大男人？阿Sa笑言：「其實都會有野蠻女友啦！」在旁的阿嬌即辯稱：「我唔係咁嘅人。（咁男友算唔算大男人？）佢都唔係。」講到有指K先生與Big Bang隊長G-Dragon是老友？阿嬌則言不要太信傳聞。
阿嬌透露男友在聖誕要陪家人，問K先生一家人住香港及K先生的工作？阿嬌又變得口密：「唔會話畀大家知，你哋即管估啦。」阿Sa則抵死說：「係呀，估啦，但估中冇獎o架。」阿Sa又稱曾與K先生見面，但兩對情侶一齊出來就未試過。