黃智賢 情深漢唔敢掂蓮妹
近年演奸角演出位的無綫藝員黃智賢，於民初新劇返璞歸真，演一名情深漢子，與「小龍女」陳玉蓮發展感情線。他首次與蓮妹合作，表演得乍驚乍喜，拍攝親密鏡頭時左諗右諗：「小龍女神聖不可侵犯，死喇，我隻手掂佢好定唔掂佢好呢？」
黃智賢（Ben）去年演的「辣薑」奸到出汁，奸到贏埋台慶「最佳男配角」，奸角形象深入民心，睇得人咬牙切齒！但他於民初新劇《名媛望族》還原基本步，演他最拿手的「好人」角色，與近年回流無綫拍劇的陳玉蓮發展感情線，當他得知有機會跟蓮妹合作時，驚喜莫名：「估唔到我可以同『小龍女』拍戲！仲要同佢拍第一場就有身體接觸嘅戲份，我拍嗰陣諗，『小龍女』神聖不可侵犯，死喇，我隻手掂佢好定唔掂佢好呢？」他大讚蓮妹演技不慍不火，切合角色性格。
在劇中飾演絕種好男人的Ben，眼見蓮妹已嫁予他人，但仍默默守候，這種偉大情操未必一般人能夠領略：「我對蓮妹嘅感覺係見到佢幸福就安然，因為你愛呢個女人，所以唔會敗壞佢嘅名聲。」
自己消毒餐具
他們拍這套劇時，走訪上海多個名勝取實景。Ben又大爆蓮妹並非想像中嚴肅、不食人間煙火，而且有個小習慣：「每次拍戲食飯，佢都會拎個樽仔出嚟，入面裝咗啲好高濃度嘅酒，用嚟抹餐具消毒，因為佢經常去內地做義工，山區搵唔到消毒紙巾、火酒，都係靠呢個方法嚟消毒！」
採訪：專案組
攝影：李廣成
服裝及場地：Timberland
髮型：Willie Chan@HAIR CORNER