黃翠如低碳師奶 慳家扶貧
黃翠如昨現身領滙天瑞商場街市參觀，小時候已很愛逛街市的她化身「街市小博士」，大讚現在的新式街市乾淨企理，仲有駐場DJ定時開咪宣傳，感覺相當有趣！近期獲邀成為「領滙開心單車大使」的翠如支持低碳生活，初三將出席單車活動，該活動會將累積單車里數換善款，購買節能電器予「能源貧窮戶」，十分有意義！
藝人黃翠如昨日踩入天水圍領匯天瑞商場參觀街市，有如無綫劇《師奶Madam》師奶上身四圍逛。爸爸曾在街市賣魚的她，就對街市內的魚檔有股情意結，見到巨型龍躉後更在檔口眼定定駐足多時。而街坊見到翠如大駕光臨後，都紛紛要求合照，她亦笑笑口永冇Say No。
閒時幫手買餸
自言從小「蒲」街市的翠如，望見新式街市比起以前的整潔，更有駐場DJ定時開咪宣傳，感覺好新奇：「好似專賣和菓子嘅商店咁，好卡通片！地下唔會濕漉漉，通風系統又好好！」她又大讚街市內通道寬闊，能方便輪椅人士出入。就算現時經常忙拍劇的她，也會落街市幫媽咪買餸：「好似一條冬瓜咁，超市貴成三倍，你睇我幾知價！」
推動社區建設
至於年初三時會在「領匯單車行大運」打氣的翠如，就以「領匯開心單車大使」身份大讚活動將累積單車里數轉化成善款，購買節能電器予本地「能源貧窮戶」別具意義，因為能夠將環保低碳概念，結合扶貧工作：「我好鍾意做社區建設，可以用行動幫有需要嘅人，投入感大好多，好過淨係捐錢！遲吓都會同阿廉（曹永廉）去自己做善事。」她又自爆一直喜愛踩單車做運動：「我屋企都有三架單車！」但大呻男友從未試過陪自己踩車，希望日後可以與對方單車浪漫遊。而一直響應低碳生活的她，就笑指屋企有衣食：「屋企人多，所以好少食淨嘢！」更得戚話自己做足垃圾分類。
文：影視組