錢國偉：志偉教我開竅
搞鬼監製錢國偉（Wilson）曾製作多個甚受歡迎的綜藝節目，但他直言入行時尚未開竅，直至與恩師曾志偉齊齊炮製《獎門人》系列，才令他諗橋速度突飛猛進，他亦視瓣瓣掂的志偉為人生榜樣，感謝他在其低潮期的扶持。
曾志偉絕對係我啟蒙老師，由我一個傻仔教到我開竅！記得90年代初我主力拍ＭＶ，其後有機會做吓大騷，但仲未開竅，只係識鋪排場面，唔識帶啲趣味畀觀眾，直至同志偉一齊做《獎門人》先開始大進步，因為諗嘢慢啲都畀人笑！
轉數慢畀人笑
志偉鍾意一班人一齊諗橋，佢覺得創作要好多人一齊做，先可以多元化，令觀眾有共鳴，佢又鍾意用新人，幕前幕後都係，諗法會新鮮啲，我都沾染咗呢個習慣。志偉會逼大家交橋，諗得好會畀獎勵眼神，好似獎條魚畀你咁，諗唔到就整個鄙視眼神你！當時同阮兆祥、錢嘉樂、林曉峰、鄧兆尊等鬥快諗橋，慢得滯會畀人笑o架！會話「肥仔，慢啲喎，諗咗三轉你先返嚟！」所以好多嘢真係要逼出嚟！
低潮期獲扶持
志偉好少特登畀評語你，但你問親佢，佢都有金石良言贈你，當年同陳生（陳志雲）發生嘅意外（註：2010年陳志雲捲入涉貪案），係我低潮期，我唔敢騷擾志偉，只係打過一次電話畀佢，因為覺得冇人幫到自己，只可以等，諗下自己究竟做錯乜，但志偉同傳媒講咗句說話令我好深刻，畀到信心我，佢話：「非禮佢就可能有份，貪污點會？」表面上好似話緊我，但其實係同大家講信我冇做過。
志偉係演藝圈入面我最佩服嘅人，佢非常吃得開又瓣瓣掂，電影、電視、慈善、運動、飲食……數都數唔晒，一日開七個會，仲要瞌眼瞓都知你講緊乜，係幾咁犀利！佢係我目標，喺佢身上嘅嘢學極都學唔晒，我冇可能超越佢。
口述：錢國偉
筆錄：影視組