三哥轉小巴乘客冇變過
無綫劇集經常被網友摷出穿崩位，前晚播出的《雷霆掃毒》又有新發現！苗僑偉在劇中剛坐完小巴，轉坐另一路線的小巴，豈料轉車後的小巴竟然有三名乘客跟轉車前一模一樣，甚至連位置也原封不動。
網友睇無綫劇集練到金睛火眼，咁又係，眼力稍差隨時睇漏徐子珊場一秒鐘輪姦戲！網友依家睇劇就如玩遊戲，最愛捉錯處，繼《飛虎》有臨記坐足十幾年後，前晚播出的《雷霆掃毒》又出現奇景，劇情講述「三哥」苗僑偉剛從小巴落車，再轉乘另一小巴路線，怎料他轉車後，小巴上的三名乘客竟然跟之前小巴上的乘客一樣，有個臨記直頭坐在窗邊尾二單人位無郁過！難道他們跟三哥一樣轉搭同一架小巴咁巧妙？
黃智賢微博捱鬧
而在劇中演奸角「潘Sir」的黃智賢，其微博更由劇集播映以來，被林峯及徐子珊的粉絲群日以繼夜不停轟炸，難聽說話百出，包括罵他是超級賤男、要打死他、「呼籲」他別再破壞林峯及徐子珊的「幸福」等。最大的問題就是這班忠實粉絲是直接罵「黃智賢」這個人，而非他的角色「潘學禮」，令黃智賢初時感覺很不舒服：「初初唔開心，佢哋係鬧我個真名唔係我個角色名！我覺得有時啲觀眾熱情得滯，你同佢哋個偶像對抗你就係衰人！睇得到嗰種力量，你要接受娛樂圈係有呢種現象。」他笑言現時已經鬧得如火如荼，之後有些主角更是因他而死，怕到時會被人埋伏！
文：專案組