AOA 23歲孖妹未拍過拖呻慘
女子組合AOA以孿生姊妹姿態進軍樂壇，Annelle（大Ann）和Annice（小Ann）今年23歲，卻從未拍過拖，不過大Ann踢爆妹妹異性緣甚佳，追求者又比她多，笑言將來會破壞小Ann的戀情！
吳燕珊（Annelle、大Ann）與吳燕菁（Annice、小Ann）這對孖生姊妹樣貌、身形都非常酷似，問到有否試過對調身份整蠱男朋友？兩姊妹齊聲大叫：「好慘呀！仲未拍過拖呀！」小Ann大嚷：「細個爹哋媽咪唔畀我哋拍拖，上咗大學又遇唔到啱嘅人，我哋班得4、5個男仔，全部都有女朋友。」
鍾意吳彥祖
大Ann表示自己要求唔高：「又唔一定要靚仔，我鍾意陽光運動型，要有幽默感同會氹我開心！」小Ann則說：「我就鍾意啲體貼gentlemen、成熟穩重型嘅男仔，好似吳彥祖咁就最好！」
問到誰較受fans歡迎？家姐就大爆小Ann有好多男fans，小Ann自信地說：「我異性緣不嬲都好過佢！」原來大Ann自小讀書成績好，小學時甚受女同學歡迎，連生日禮物都多過妹妹，令小Ann非常羨慕。大Ann笑說：「但係上咗中學就唔係喇，佢好多男仔追，搞到我鬼咁羨慕！如果第時佢拍拖，我覺得個男仔唔好嘅話，我會拆散佢哋！」當然大Ann只是在講笑，並直言若然有好男仔都會幫忙撮合。
今年樂壇湧現多隊女子組合，問到如何突圍？小Ann搶着說：「我哋4歲已經學跳舞，一直都有好多表演，入行前又做過5年主持，所以對舞台會比較熟悉囉！」
想攞新人獎
大Ann補充說：「我哋會喺舞蹈上落多啲工夫，《我主場》呢隻歌特登請Sunny Wong校長幫我哋排舞，比較男仔step啲，會走型格路線！」她們又對年尾頒獎禮信心十足，小Ann說：「信心就有嘅！最想拎新人獎，因為得一次咋！」
文：音樂組