陳志健畀「女」摸老婆興奮
資深演員羅樂林女兒羅苡之跟前港男陳志健結婚後，隨即出發到蘇梅度蜜月，兩公婆除在沙灘享受超hea二人世界外，Otto更自爆被當地靚「女」摸，不過老婆Tisha居然看得好開心！
日前港男陳志健（Otto）與老婆羅苡之（Tisha）於本月四日正式拉埋天窗，兩天後即飛往蘇梅度蜜月七天，兩公婆更自駕四圍去，看日出兼Hea遊沙灘。來到外地，二人也顯得特別放鬆，男的穿三角泳褲騷肌肉，女的則穿性感比堅尼露事業線，認真毫不吝嗇，Tisha更親自操刀為Otto拍照留念。不過難得新婚外遊，老公仔Otto居然沒有製造任何驚喜，反由酒店為二人布置浪漫「新房」，送贈他們香檳及以玫瑰和毛巾拼成的心形「雙天鵝」，Tisha非常滿足，開心得趴低拍照留念。
機上遇大氣流
來到泰國少不了看人妖騷的環節，Otto則自爆被三、四名人妖下台摸面，並笑謂：「我覺得佢哋好似明星，好靚，畀人摸真係好好笑，（老婆呷醋？）冇，佢好興奮，因為佢鍾意睇我個怕醜樣。」之後，夫妻倆又齊齊看泰拳，Tisha亦看得非常肉緊，Otto說：「老婆第一次睇泰拳，見到有人打爆頭，佢緊張到揸實拳頭睇！之後仲有當地小朋友上台打拳，好得意，（將來要兒女學泰拳？）好健康，佢鍾意嘅話都ok。」談到此趟最難忘經歷，Otto表示在機上遇大氣流，Chok到似玩跳樓機，機上所有人都大叫，最後落機前眾人拍手，兩個都覺得很好笑。
文：影視組