農夫借嘟姐過橋谷Talk Show

當日農夫演唱會因缺乏宣傳反應欠佳，被當時的唱片公司勒令「取消」，幸好事隔四個月農夫捲土重來，經理人為兩人在11月18日於同一場地Star Hall開Talk Show，兩人否認向舊公司「示威」：「開到騷唔會係好威，反而做得好就威嘞！（唔好衰畀人睇？）最緊要唔好取消多一次啫。」

特製「灰鞋」贈觀眾

兩人指內部訂票反應不俗，並抵死謂：「唔係好擔心，因為呢次宣傳充足，我哋用取消一個演唱會嚟做宣傳喎，開騷冇人打嚟話留飛，send短訊打氣，但一話取消就收到好多SMS，話好可惜、好想睇！（好諷刺？）正如睇波，最好睇就係球迷搞事，衝落球場搞到停賽，我哋咪一樣囉，但呢啲一次夠嘞，場場波有球迷搞事都唔好啦。」能在短時間將Talk Show成事，農夫感激各方好友及贊助商出手支持，令兩人感到人間有情。

至於Talk Show話明「自爆」，C君和陸永以豁出去分享感情和工作的「賴嘢事件」，身邊朋友都有被爆機會，最好對方來捧場可以當着面爆他。而兩人視黃子華為「棟篤笑之神」，最想邀請對方，但兩人沒膽量只好出蠱惑招：「我哋會請嘟姐（鄭裕玲）嚟睇，再叫嘟姐請佢嚟，嘟姐有種好強勞役人嘅能力，佢開口會勁好多。」兩子更透露Talk Show的壓軸部分會是濃縮版演唱會，令入場歌迷用一張票價錢就獲得兩種娛樂，運動品牌還特製「灰鞋」讓他們送給觀眾。

文：音樂組

攝：黃叔榮

服裝及場地：EverAfter

化妝：Manyee Lau

髮型：Renton@via il colpo