江若琳為公主病平反

Elanne近日推出的新碟《天空之樹》反應理想，日前她拍攝新歌《水火不容》MV，為配合歌曲內容，導演特別安排極多家具及衫讓她亂fing、亂掟，Elanne一埋位就將放在梳化的衫拋落地，之後因太掛住男友跪在地上攬住對方的衫痛哭。

曾掟爛兩個電話

問到現實生活中是否亂掟嘢？Elanne說：「當年拍拖都試過，鬧交嗰刻好難控制情緒，咩難聽說話都講得出，真係好傷感情。（最勁一次係點？）將屋企電話同自己個手機掟爛，諗番起覺得好蠢，當然依家大個咗處理會唔同，會用口講同理論，至少控制到情緒。」

等心儀對象追求

近年轉攻內地市場的Elanne坦言有心儀對象，現等待對方「action」，她說：「要精心去揀，始終係結婚對象，如果唔係揀老公咁就有好多選擇。」經常被指有「公主病」的Elanne否認說：「呢個係大家未了解我嘅錯覺，我比男仔更男仔、求其、豪邁同冇所謂。（依家有冇時間拍拖？）都有時間了解吓。」

文：音樂組