黃宗澤怒火街頭 Niki冇眼睇
無綫小生黃宗澤（Bosco）自與胡杏兒分手後，劇接劇忙個不停，強調二人再見亦是朋友的他，大讚杏兒在《怒火街頭2》表現出色，撐對方冧莊視后！而他前晚與周麗淇（Niki）為新劇《好心作怪》拍外景時大玩英雄救「盲妹」Niki戲碼，起飛腳怒踢飛仔，上演另類怒火街頭，隔空撐舊愛！
自與胡杏兒分手後，Bosco忘情棄愛只顧專心工作，劇接劇的他豬籠入水，身為平治粉絲的他前晚更出動價值128萬元平治Ｓ350房車，到旺角為新劇《好心作怪》拍外景，匆匆泊車後，Bosco只專心開工，放下逾百萬「新老婆」在鬧市街頭。
現場所見，Bosco和Niki吸引不少途人圍觀。劇情講述Niki意外失明，怎料在街頭被一群飛仔圍堵，暗中保護伊人的Bosco即英雄救美，起飛腳救她衝出重圍，使出直一直的「Drop Kick」，盡顯腰力，絕對功架十足，看得圍觀的fans拍爛手掌；而Niki扮盲妹亦入型入格，連途人也不禁讚她演技不俗。
多勁敵爭帝
受訪時，Bosco被問到跟Niki有否過電？他說：「拍嘢啫，入面同佢係一對，有咀戲，不過都唔太激！」對於舊愛杏兒與徐子珊力爭視后，問到他有否心水時，Bosco力撐杏兒說：「杏兒啦！佢好大機會，《怒火街頭2》做得好好，如果佢攞會恭喜佢！」不過，Bosco又稱若子珊及他人得獎，也會戥她們高興：「個個都係朋友，都開心！」談到奪視帝機會如何？他說：「年年都冇乜信心，今年好多勁敵呀，公投係講民望嘅！」
咀戲冇尷尬
Niki表示第一次做失明人士，感覺特別：「呢套劇好多嘢玩，挑戰到我演技！」談到與Bosco有咀戲，她說：「總之同佢合作好愉快，夾到囉，大家係friend底，唔會尷尬！」
文：專案組