衛蘭唔敢黐新歡 偷望止癮
衞蘭（Janice）去年與男友甩拖，久未有愛情滋潤的她日前終於再度有男仔陪行街，如沐春風的Janice為免拍拖太着迹，故意約來另一名女友人做電燈膽。雖行到離行離列，不過Janice不時邊行邊回頭偷望男伴，全程甜絲絲。
現年30歲的Janice，去年和圈外外籍型男Roger分手後，頓時加入「黃金盛女」行列。甩拖後的Janice接受訪問時坦言這段感情讓她更加認識自己，同時亦看清未來想找一個怎樣的伴侶。走出失戀傷痛後，日前Janice身邊終於再度出現男伴。
當晚6時左右，身穿格仔衫、披散秀髮的Janice，側孭一個小手袋現身銅鑼灣，身邊則有一名年約30多歲、戴帽穿西裝褸的健碩男伴，未知是否不欲新戀情曝光，兩個人的約會中間故意夾着一名女友人做電燈膽。
心情靚如開籠雀
只見Janice不時翹實女友人而行，雖然和男伴行到離行離列，但兩人不時溫馨互望玩神交，心繫對方的他們每行數步便互相張望找尋對方眼神，男伴懶理處於人來人往的馬路，頻頻回頭和Janice傾偈，愛得癡纏。
Janice一行三人不停穿梭名店選購潮流服飾，有新男伴在旁，當晚Janice心情勁靚，如同開籠雀，全程不停說說笑笑。至於男伴亦相當細心，陪她睇完衫又睇鞋再睇袋，不時給予一些意見。不過兩人寓行街於娛樂，行完一輪完全沒有幫襯，繼而結伴去食晚餐坐低慢慢傾。
文、攝：追蹤組