鄭嘉穎爆右眼 急返港送院
近年積極在內地拍劇搵人仔的鄭嘉穎，昨日在昆山為劇集拍攝一場動作戲份時，與對手拳來拳往期間，因閃避不及被打爆右眼，眼角撕裂出現兩吋長的傷口，由於傷勢嚴重，嘉穎立即飛返香港入院醫治。
人氣小生鄭嘉穎近年致力內地搵人仔賺到盆滿缽滿，一部《步步驚心》劇集令他爆紅內地，隨後接了多部內地劇，更被視為收視靈丹妙藥，有傳身酬已躍升到三十萬元人民幣一集的他，有傳以過千萬酬勞，接拍了內地劇集《葉問》，並與周秀娜及韓雪合作。
日拍五場打鬥戲
近月嘉穎瞓身在昆山投入拍攝，可惜昨日不幸發生意外，昨午鄭嘉穎共拍五場打戲，其中一場他以葉問造型在擂台上與對手拳來拳往，混亂期間他閃避不及，被對手打爆右眼，眼角當場撕裂，有傳他當時狂標淚水兼掩眼，狀甚痛苦，右眼角更出現一個兩吋長的傷口。由於情況嚴重，他立即致電回港找樂易玲求助，經過商議後樂易玲決定協助他回港入港安醫院就醫。
鄭嘉穎為免影響拍攝進度，僅以冰敷暫時處理傷口，堅持繼續負傷拍攝餘下戲份後，才啟程到機場飛返香港，表現專業。受傷後有工作人員在微博上載案發現場圖片，並留言讚揚他的專業精神，祝他一切安好。亦有工作人員在網上透露原來鄭嘉穎由清晨五時半已開始拍攝：「打足成日Ip Man（葉問）都爆缸，本來一個打十個，依家搞到唔知幾時先可以打埋最後嗰個，不知何時可以煞青」。
樂易玲安排返港
記者聯絡上樂易玲，她說：「佢畀人打爆咗眼骨，當時佢無助手同經理人喺身邊，佢打畀我問點算，我就幫佢安排機票同醫院返香港醫。」問到嘉穎會否破相？樂易玲說：「依家未知情況，男仔都好啲嘅。」
其實鄭嘉穎在劇中共有二百多場打戲，及多場爆破場面，九月時他右眼已曾受傷導致微絲血管爆裂，及後又不慎扭傷頸部，今次再被打爆眼，嘉穎可謂吃盡苦頭，賺來的千萬酬勞有血有淚。而鄭嘉穎早前曾在微博留言表示今日（26日）將出席瀋陽一個大型品牌活動，但相信他未能出席。
文：影視組