田蕊妮：每人最後一步都係咁

阿澤出事時我喺內地拍劇，佢話當時睇嘢有疊影，講唔到太多嘢，抖氣又有困難，會好易窒息！但係老公就好搞笑，因為冇家傭，佢為咗要我安心，證明可以照顧自己，佢book咗架車，一個人去超市買兩大車儲糧，仲話醫生話呢個病睇嘢，就好似飲大咗咁，所以佢話可以自己煮食。

爭住煮食

最感動就係好多朋友包括容祖兒、薛凱琪、江若琳等等都好關心，尤其薛凱琪仲話：「你兩公婆咁好人，你哋會好好o架！我叫媽咪煮定餸同湯畀阿澤！」我真係感動到喊！當時，吳君如又買冬蟲草又成日問候，楊受成買咗成十幾萬冬蟲草嚟，真係感受到好多愛。

最好笑係，老公一知我抽到時間返嚟太開心，仲問我：「阿豬，你食咗嘢未？我煮嘢畀你食！」因為佢習慣照顧我膳食，我聽到真係忍唔住話：「你收皮啦！我返嚟係照顧你！。」當時我真係好白癡，老公抵抗力好弱，但我又冇戴口罩，原來我有病菌冇發出嚟，但惹病咗佢，搞到佢好辛苦，瞓瞓吓又會起身睇佢係咪有呼吸！

體會生死

當時最心痛係佢拖住我隻手，大家瞓喺張床，望住個天花板時，真係領會到做人真係唔到我哋去控制，每一個人走到最後一步，都係望完天花板後合埋眼。另外，記得我車老公去睇醫生，見到附近有狗仔隊，我老公行得唔係幾好，佢哋只係遠遠咁影，唔會騷擾，真係好感動！記者真係好好！

經此一役，我更加覺得冇嘢可以想像到。任何一件事無論成功或失敗，老公會處理到，佢真係好犀利，今日唔知聽日事，我會更加珍惜同佢嘅日子。

口述：田蕊妮

筆錄：專案組