式芝懶理父反對 當街錫老公

Gigi早前與波爾錶太子女Sean齊齊到北京出席活動，突然「出櫃」自爆兩人已於今年四月在法國結婚，但卻不獲父親趙世曾認同，除發聲明否認女兒已婚外，還揚言出五億招婿，誓要「拗直」愛女。而與「老公」Sean愛得癡纏的Gigi，仍然懶理父親反對，繼續與Sean出雙入對。

孖住出海追月

前日下午3時許，Gigi駕駛掛上兩人名字車牌「Z1SEAN」、價值百多萬元的白色電動跑車返回兩人位於大坑徑的愛巢，而Sean亦提早到樓下門外迎接，之後齊齊上樓溫馨，當時兩人左手的無名指均戴上婚戒。

趙世曾	Gigi情不自禁錫Sean面珠。

於愛巢二人世界溫馨約兩個半小時後，兩人梳洗換過衫再次步出，Sean將手上兩袋東西放上車尾箱後，尾隨的Gigi突然情不自禁地錫了「老公」臉珠一啖，其後由Gigi驅車前往灣仔，並將車停泊在路旁，Sean落車到附近超市，而Gigi則在車上等候，未幾見Sean買了兩袋冰粒上車，之後兩人交換位置，由Sean驅車直駛香港仔深灣遊艇會，估計是出海睇煙花度浪漫追月夜！

芝芯換過衫後又出動。

泊好車後，Sean繼續做阿四拎嘢，與Gigi往登遊艇出海。

與父度節冇Sean

另外，有傳「芝芯」於下月在香港補擺喜酒，隨後便會飛往同性婚姻合法化的瑞典註冊，但Gigi因父親趙世曾反對而取消。昨日記者就此事致電Gigi及Sean，兩人均不作回應。而趙世曾的電話則接駁到留言。而向來孝順的Gigi，據知日前提早和父親吃飯慶中秋，其弟趙式浩昨接受電話訪問，承認一家人飯聚，但Sean冇現身。「因為式芝可能要去個短trip，所以一家人提早食飯預祝，大家都食得好開心。我諗件事係時候停一停，因為式芝夾喺中間好難做，畀多啲時間父母去接受。（你幫式芝向爸爸講好話？）要講嘅已經講晒，爸爸係一個好聰明嘅人，希望大家畀空間佢哋！」

文、攝：追蹤組