張文慈徹夜禱告 尋失蹤弟兄

撞船事故後，圈中一班基督徒包括張文慈、王祖藍、蔡少芬和林淑敏等在微博發動祈禱，望死難者安息及尋回更多生還者，更驚爆該船上有多個教友家庭，其中有一家四口同告墮海，除了母親被救起，父親及兩女杳無音訊，眾星即為他們祈禱，猶幸昨晨傳來該家庭已平安無恙的消息。

翌日報平安感謝神

身在高雄慶祝生日的Pinky昨日接受電話訪問，直言徹夜為失蹤者祈禱：「朋友話畀我知當事人已經喺Facebook報平安，真係要感謝神！」她自言很眼淺，如果在港得悉此事應會更加難過，她說：「死者已矣，祈求佢哋安息，留在世上的人盡快忘記傷痛，堅強啲！大家都要活在當下。」王祖藍則說：「我唔識嗰家人，都係透過教會知道隻船仲有幾家教會家庭，其中有另一個一家四口一齊去，個小朋友無咗，（會唔會打去慰問？）我無直接同佢哋聯絡，但會為佢哋禱告，一有消息都會喺微博通知弟兄。」

此外，寇鴻萍大女唐貝詩（Lydia）前晚與o靚模好友黃子菲和郭富城御用排舞師Sunny Wong夫婦等在中環對開海面看煙花，對於今次海難，不時跟父母坐郵輪的Lydia直言十分驚訝：「好唔開心，生死好似一線之差，知道件事後，我同屋企人為死傷者祈禱，（覺唔覺得好危險？）大家當時都唔會諗過有呢啲意外，但諗番起海上意外其實特別危險，就算識游水都未必可以逃生。」

手機唔通嚇親阿媽

而下午已跟老公出海的黃子菲，表示當時已感到海面好大浪，船家亦小心慢駛，她說：「我同老公玩水上電單車，都feel到好大浪，雖然有着救生衣，但玩咗一陣都即刻上番船。到夜晚睇煙花時，附近啲船嘅乘客企晒喺船頭，因為要爭靚位睇煙花，搞到隻船都傾埋一邊，其實都幾危險！」撞船意外發生之時，剛巧其手機在海上沒有訊號，令黃母非常擔心，她說：「佢由撞船意外開始不停打畀我，但我收唔到訊號，一上船我即刻打畀媽咪，先知發生咁大件事，聽到事件真係好唔開心，希望死者安息。」

文：專案組