趙式芝出櫃法國嫁太子女
【林麗玉北京直擊】近年不少圈中人先後公開同志身份，紛紛「出櫃」，而富豪趙世曾女兒趙式芝（Gigi）與鐘錶太子女楊如芯（Sean）前晚在活動上高調自爆夫妻關係，還驚爆於4月4日在法國秘密結婚，成為首對自揭同志婚姻的名人，震驚Ball場。惜Gigi父親趙世曾與母親姚煒都不接受女兒的另一半是同性！
前晚趙式芝與Sean雙雙在北京出席波爾錶與寶馬汽車推出全新手錶酒會，兩人合照一改常態，表現親暱手握着手，問及是否想公開關係時？Sean自稱向來沒有隱瞞，二人光明正大，當再追問有否想過結婚？她即語出驚人說：「結咗啦，今年4月4日喺法國行教堂，初初都諗住畀個驚喜佢（Gigi），但諗諗吓如果佢say no點算，所以喺我生日時同佢講（求婚），當時家人、好朋友都在場見證。」
手戴婚戒甜蜜蜜
Sean承認有個浪漫婚禮，身為天主教徒的她選擇以天主教儀式行禮，全程在神父見證下進行：「行教堂，有影婚紗相，好好嘅朋友，兄弟姐妹都有參加，本來爹哋媽咪都去，但媽咪有病，行動不便，所以冇嚟。（對Gigi有乜愛的宣言？）日日都有愛的宣言。」現場所見，二人手上戴上婚戒，甜蜜之情不言而喻。
談到決定結婚的原因，Sean解釋二人已拍拖七年，笑言已屆七年之癢應有個新階段，給對方一個肯定，加上彼此真心相愛。問到公開是否不介意別人看法？Sean堅定的說不介意：「世界好open，依家乜年代，男同性戀或女同性戀都冇嘢，兩情相悅，真心相愛就得，一男一女嘅婚姻都會離婚。（婚後有咩感覺？）覺得真係變咗一家人，好似今次北京活動，佢遲我一日嚟，因為我爹哋生日，佢代表我同爹哋慶祝。」
「被呃咗上賊船」
受訪期間Gigi一直站在Sean旁邊，沒有發言，儼如背後的小女人，問到Sean如何打動她？Gigi甜笑說：「佢都冇畀我選擇，呃我上機，我就咁上咗賊船。（心情點？）好開心。」不過，她坦承父母不願意她公開，為尊重他們，她亦不想多談：「我自己冇乜所謂，反而爹哋媽咪唔想我主動去講。（努力做好，得到父母祝福？）Sean爹哋媽咪好錫我，家人好融洽，好榮幸得到佢哋照顧，成為佢哋一分子，感受佢哋對仔女嘅愛，真係好偉大。」Gigi說要給時間香港人去接受，因為香港人比內地人更保守，又指儒家思想以孝為先，故想尊重父母。